Աշխարհին սպասում է ամբողջովին էլեկտրոնային կոմերցիան եւ էլեկտրոնային տնտեսությունը: Այս մասին հայտարարել է Alibaba Group-ի հիմնադիր Ջեք Ման «Բաց ինովացիաներ» ֆորումի ժամանակ:
Նրա խոսքով՝ արտադրությունը նոր աշխատատեղեր չի ստեղծի, քանի որ արտադրությամբ կզբաղվի արհեստական ինտելեկտը: «Շուտով կարեւոր չի լինի՝ պատրաստված է Չինաստանում, ԱՄՆ-ում, թե մեկ այլ վայրում: Արտադրությունը նոր տեղեր չի ստեղծի, քանի որ արտադրությամբ կսկսեն զբաղվել մեքենաներն ու արհեստական ինտելեկտը, իսկ մարդիկ կզբաղվեն ինչ-որ այլ բանով»,- ՏԱՍՍ-ի փոխանցմամբ ասել է ընկերության հիմնադիրը:
Ջեք Ման նշել է, որ մարդիկ չպետք է անհանգստանան այն փաստից, որ իրենց տեղը գրավելու են մեքենաները: «Այո, ժամանակի ընթացքում մեքենաներն ավելի շատ կլինեն, քան մարդիկ: Իսկ մարդիկ մարդ կմնան, նրանք արժեքներ ունեն»,- ասել է նա: