Mitsubishi Motors ընկերությունը սեփական զարգացման նոր ծրագիր է ներկայացրել, որը կոչվում է Drive for Growth: Այն նախատեսված է 3 տարվա համար: Ըստ փաստաթղթի՝ այդ ժամանակահատվածում ճապոնական ավտոարտադրողը 11 նորույթ կներկայացնի, որոնցից վեցը միանգամայն նոր մոդելներ կլինեն, փոխանցում է Motor-ը: 

Mitsubishi Motors-ից նշել են, որ զարգացման ծրագիրն առաջին հերթին կվերաբերի ամենագնացներին եւ փիքափներին: Ընկերությունից հավելել են, որ արդեն 11 նորույթի ցանկի մեջ են ընդգրկված Eclipse Cross քրոսովերը, ինչպես նաեւ Xpander «քրոսովենը», որը օգոստոսի կեսին ներկայացվել է Ինդոնեզիայում:

Drive for Growth ծրագրով նաեւ նախատեսված է հետազոտությունների եւ մշակումների համար ծախսերի 50-տոկոսանոց ավելացում՝ մինչեւ 133 մլրդ իեն (1,1 մլրդ դոլար): Ծրագրի արդյունքներով՝ Mitsubishi Motors-ում ցանկանում են հասնել 6 տոկոս շահույթի: 2016 թվականին այս ցուցանիշը կազմել է 0,3 տոկոս:

Ավելի վաղ իր զարգացման ծրագիրն է հրապարակել նաեւ Renault ընկերությունը: Այն կոչվել է Drive the Future: Նախատեսում է առաջիկա 6 տարիներին թողարկել 21 նոր մոդել: