Անհայտ տղամարդն այրել է իրեն Վարշավայում՝ Մշակույթի եւ գիտության պալատի շենքի առջեւ։ Նա տեղափոխվել է հիվանդանոց ծայրահեղ ծանր վիճակում, հաղորդում է Լեհական ռադիոն։
Լեհական ռադիոյի փոխանցմամբ՝ այդ քայլով տղամարդն իր ընդվզումն է արտահայտել Լեհաստանում իշխող «Օրենք եւ արդարություն» կուսակցության ու նրա առաջնորդ Յարոսլավ Կաչինսկու դեմ։ Նա նաեւ նամակ է թողել։
Նամակում, մասնավորապես, նա ասում է, որ իր արյունը իշխող կուսակցության խղճին է։
Ցուցակում, որի դեմ ընդվզում է տղամարդը, ընդգրկվում են քաղաքացիական իրավունքների ու ազատությունների սահմանափակումները, ժողովրդավարության սկզբունքների խախտումները, սահմանադրական խախտումները, բնության ոչնչացումն ու Բելովեժյան թավուտի անտառահատումը, իշխող կուսակցության անդամների կողմից զբաղեցվող զանազան պաշտոնները, թշնամական վերաբերմունքը փոքրամասնությունների, այդ թվում նաեւ ներգաղթյալների ու ԼԳԲՏ ներկայացուցիչների ու այլոց հանդեպ։