Դանդաղ պատերազմը մեզ ձեռք չի տալիս: Այս մասին, այսօր՝ հոկտեմբերի 24-ին, ԱԺ-ում լրագրողների հետ զրույցում նշել է ՀՀԿ խմբակցության ղեկավար Վահրամ Բաղդասարյանը:
Դիտարկմանը, որ ՀՅԴ-ն առաջարկում է, որ հայկական կողմը ԵԱՀԿ Մինսկի խմբի համանախագահներին առաջարկի միակողմանի կատարել Վիեննայի եւ Սանկտ Պետերբուրգի պայմանավորվածությունները եւ շփման գծում վերահսկող սարքեր տեղադրվեն, Բաղդասարյանը նշեց, որ դա մեզ ձեռնտու տարբերակ է. «Դա նաեւ մի քիչ խնդրահարույց է, քանի որ պետք է լինի երկկողմանի համաձայնություն, բայց մենք այդ առաջարկը նորմալ ենք ընդունում եւ Մինսկի խումբը պետք է դրա պատասխանը տա»:
ՀՀԿ խմբակցության ղեկավարը բացառեց լայնածավալ պատերազմի հավանականությունը. . «Ես գրեթե բացառում եմ լայնածավալ գործողությունները, որովհետեւ Ադրբեջանը գնահատում է իր ուժերը, ձախողված փորձը նրանց համար դաս եղավ: Ես չեմ կարծում, որ այստեղ խնդիրներ կարող են առաջանալ: Այս դանդաղ պատերազմը մեզ ձեռք չի տալիս, ձեռք չի տալիս նաեւ Ադրբեջանի ժողովրդին, բայց այդտեղ կա զուտ իշխանական շահը, Ալիեւի իշխանության շահը, որի համար որեւէ գրոշի արժեք չունեն իր զինվորների կորուստները»:
Հարցին, թե արդյոք հայկական կողմը չպե՞տք է անմիջապես պատասխան տար Ադրբեջանի հերթական սադրանքին, երբ վերջինիս կողմից «Սպայկ» հրթիռներ են կիրառվում, Վահրամ Բաղդասարյանն արձագանքեց. «Բայց մենք խաղաղ բանակցություններով խնդրի կարգավորման ջատագովն ենք: Ինչ վերաբերում է պատասխան գործողություններին, համոզված եղեք, որ մենք պատրաստ ենք եւ թշնամու կողմից ցանկացած ագրեսիա կստանա իր արժանի պատասխանը»:
