Պաշտպանության նախարար Վիգեն Սարգսյանը կտրականապես հերքել է տարածված լուրերն այն մասին, թե պարտադիր զինվորական ծառայությունը դառնալու է 3 տարի:
Այսօր՝ հոկտեմբերի 25-ին, խորհրդարանում «Զինվորական ծառայության եւ զինծառայողի կարգավիճակի մասին» ՀՀ օրենքի նախագծի քննարկման ժամանակ «Ելք» խմբակցության պատգամավոր Սասուն Միքայելյանը հայտնեց, որ հասարակության մեջ ակտիվորեն լուրեր են շրջանառվում, ապա նախարարից հետաքրքրվեց՝ հնարավոր է առհասարակ, որ առաջիկա 5 տարիներին պարտադիր զինվորական ծառայությունը 2-ից դառնա 2,5 կամ 3 տարի:
«Լուրերը, թե պարտադիր զինվորական ծառայությունը կարող է դառնալ 3 տարի, իրականությանը չեն համապատասխանում, այդ լուրերն առաջացել են լայք հավաքող լրատվամիջոցների վերնագիր կազմելու արվեստից, ուղղակի մարդկանց ուշադրությունը գրավելու համար առանց օրենքի նախագծին ծանոթանալու նման հոդվածներ են հրապարակել, վերլուծություններ են արել, շատ ցավալի է դա մեզ համար: Ինչ վերաբերում է հարցին, թե հնարավոր է 5 տարվա ընթացքում ժամկետը փոխվի, ասեմ, որ մենք մտադրություն չունենք նման առաջարկ անելու»,- ասաց Վիգեն Սարգսյանը:
