Հայաստանի Հանրապետության եւ Ռուսաստանի Դաշնության միջեւ ավտոմոբիլային տրանսպորտով միջպետական փոխադրումները կանոնակարգելու նպատակով 2017թ. հոկտեմբերին ՀՀ եւ ՌԴ կառավարությունների միջեւ ստորագրվել է «Միջազգային ավտոմոբիլային հաղորդակցության մասին» նոր համաձայնագիր։
ՀՀ տրանսպորտի, կապի եւ տեղեկատվական տեխնոլոգիաների նախարարությունից NEWS.am-ին հայտնում են, որ Այն նպատակ ունի կանոնակարգելու երկու երկրների միջեւ միջպետական կանոնավոր եւ ոչ կանոնավոր ուղեւորափոխադրումները եւ բեռնափոխադրումները։
Ըստ համաձայնագրի՝ ԱՊՀ անդամ երկրների միջեւ տրանսպորտային անվտանգությունն ապահովելու նպատակով, ինչպես կանոնավոր, այնպես էլ ոչ կանոնավոր ուղեւորափոխադրողները պարտավոր են տեղեկատվական օպերատորների հետ կնքել համաձայնագիր, ըստ որի՝ մինչեւ երթը սկսելը պետք է տրամադրեն տրանսպորտային միջոցի անձնակազմի եւ ուղեւորների անվանացուցակը: Հակառակ դեպքում հնարավորություն չեն ունենա հատել տվյալ երկրի սահմանը:
Պայմանագրի համաձայն՝ Հայաստանի եւ Ռուսաստանի միջեւ միջպետական կանոնավոր ուղեւորափոխադրումները պետք է իրականացվեն բացառապես երկու երկրների լիազոր մարմինների կողմից հաստատված փաստաթղթերով (չվացուցակի, երթուղու սխեմայի, փոխադրավարձի վերաբերյալ) թույլտվությունների բնօրինակների հիման վրա։
Երկու երկրների օրենսդրության համաձայն՝ կանոնավոր ուղեւորափոխադրումները պետք է իրականացվեն միայն ավտոկայարաններից։ Լիազոր մարմինների կողմից թույլտվություններ կտրամադրվեն այն փոխադրողներին, որոնք ավտոկայարանների հետ կունենան սպասարկման պայմանագրեր։
Փաստաթղթով սահմանվում է նաեւ Հայաստանից Ռուսաստան եւ հակառակ ուղղությամբ միջպետական ոչ կանոնավոր ուղեւորափոխադրումներ իրականացնելու կարգը։ Ըստ այդմ՝ ոչ կանոնավոր ուղեւորափոխադրումները կիրականացվեն միայն լիազոր մարմնի կողմից տրված թույլտվությունների հիման վրա։
ՌԴ եւ հակառակ ուղղությամբ ոչ կանոնավոր փոխադրումներ կատարելու թույլտվություն ստանալու համար փոխադրողները պետք է դիմեն ՀՀ տրանսպորտի, կապի եւ տեղեկատվական տեխնոլոգիաների նախարարություն։
Թույլտվություն տրամադրելու համար պարտադիր պայման է սահմանվում, որ տվյալ փոխադրումը լինի զբոսաշրջային կամ որեւէ այլ նպատակով եւ չկրի կանոնավոր բնույթ։
