Պերուում խոշոր հրդեհը մեծ վնաս է հասցրել Վենտարոն հնագիտական համալիրին՝ ոչնչացնելով պատին նկարված 2 հազար տարվա որմնանկարը, հայտնում է Comercio պարբերականը:
Համալիրի ղեկավար Իգնացիո Ալվայի խոսքով՝ Վենտարոնում էր գտնվում «Ամերիկայի ամենահին որմնանկարը», որը 2 հազար տարեկան էր:
Ալվայի կարծիքով՝ հրդեհի պատճառը, հավանաբար, շաքարեղեգի թփերն այրելն էր, որոնք շրջապատում են մշակութային հուշարձանը: «Համալիրի տանիքը ծածկված է դյուրավառ նյութով, եւ հենց այս պատճառով է կրակն արագ տարածվել»,- նշել է նա:
Պերուի Մշակույթի նախարարությունից հայտնել են, որ դիմել են իրավապահ մարմիններին, որոնք կգնահատեն հրդեհի պատճառած վնասը եւ կպարզեն մեղավորներին:
Վենտարոնը հնագիտական համալիր է Պերուի հյուսիսային մերձափին, որի տարածքում մինչկոլումբոսյան քաղաքակրթության տաճար է եղել, որի տարիքը 4,5 հազար տարի է: Հնագետները տաճարը պեղել էին 2007 թվականին: