Կնոջը թունավորելու սպառնալիքով առեւանգելու մեջ մեղադրվող Զավեն Մ.ն դատապարտվել է 6 տարի 6 ամիս ազատազրկման։ Արարատի եւ Վայոց Ձորի մարզերի ընդհանուր իրավասության դատարանը նրան մեղավոր է ճանաչել ՀՀ քրեական օրենսգրքի 137 հոդվածի 1-ին մասով, 34-131 հոդվածի 2-րդ մասի 2-րդ կետով, 147 հոդվածի 1-ին մասով եւ կալանքի տակ վերցվել դատարանի դահլիճից:
Ըստ մեղադրական եզրակացության, 2015 թվականի հոկտեմբերի 6-ին, ժամը 19-ի սահմաններում Զավենը ալկոհոլի ազդեցության տակ գնացել է մոր տուն հեռացած կնոջ մոտ: Նա տնամերձ հողամասի վերջնամասի ցանցապատ ցանկապատից մուտք է գործել բակ, մոտեցել է տան դռանը, ոտքով հարվածել ու ջարդել է դռան փականը: Զավենը կնոջ կամքին հակառակ մուտք է գործել տուն՝ նրան առեւանգելու, իր հետ տանելու նպատակով: Այդ ժամանակ կինը մոր հետ հեռախոսով խոսելիս է եղել, մայրը լսել է դստեր վախեցած գոռոցը. «Թող, խուժան, թող»: Զավենը բռնել է կնոջ մազերից ու քաշելով տնից դուրս է բերել, պահանջել է, որ նա վերադառնա իր տուն, սակայն, կինը մերժել է:
Որպեսզի մարդիկ չտեսնեն՝ Զավենը որոշել է կնոջը դաշտերով տանել իր տուն: Նրան քարշ տալով՝ «գետնաքարշ» տարել է տնամերձ հողամասի վերջնամաս: Ըստ դատական ակտի՝ Զավենն այդ ընթացքում կնոջը պատճառել է «ֆիզիկական ու հոգեկան տառապանքներ՝ ուժեղ ցավ, ձախ կրծքի, ձախ ազդրի, աջ ծնկահոդի մակերեսի արյունազեղումների ձեւով վնասվածքներ՝ թեթեւ վնասի հատկանիշներ չպարունակող»: Ամբողջ ընթացքում կինը գոռացել ու դիմադրություն է ցույց տվել: Հողամասի վերջնամասում Զավենը, ըստ դատական ակտի, «գիտակցելով, որ այդ ձեւով կնոջը չի կարող անցկացնել ցանցապատ ցանկապատի վրայով, նրա դիմադրությունը ճնշելու, առկա խոչընդոտները վերացնելու համար» որոշել է կյանքի ու առողջության համար վտանգավոր բռնության սպառնալիքով հասնել իր նպատակին: Նա գրպանից հանել է նախապես իր հետ վերցրած թունաքիմիկատով շիշը, բացել է խցանը, կնոջ մազերից բռնելով՝ շիշը մոտեցրել է նրա դեմքին ու սպառնացել է, թե զոռով թույնը կխմեցնի ու կսպանի: Զավենի արարքից վախեցած կինը հարվածել է նրա ձեռքին եղած շշին: Դրանից հետո կինը, վախեցած լինելով, հաձայնություն է տվել՝ Զավենի հետ գնալու: Զավենը մի կողմ է նետել շիշը, գրկել է կնոջ ուսերը, նրա հետ գլորվելով անցել է ցանկապատից այն կողմ, որի ժամանակ պատռվել է կնոջ սպորտային տաբատը, հագուստի մի կտորը մնացել է ցանկապատի ցանցի վրա: Երբ ցանկապատն անցել են, Սուսանը չի ցանկացել գնալ Զավենի հետ: Վերջինը նորից բռնել է կնոջ մազերից ու քաշելով տարել:
Զավեն Մ.-ն ՀՀ քրեական օրենսգրքի 34-131 հոդվածի 2-րդ մասի 2-րդ կետով եւ 137 հոդվածի 1-ին մասով՝ առեւանգման փորձ ու սպանության սպառնալիք, իրեն մեղավոր չի ճանաչել, մեղավոր է ճանաչել միայն Սուսանի կամքին հակառակ նրանց բակ ու տուն մուտք գործելու համար՝ ՀՀ քրեական օրենսգրքի 147 հոդվածի 1-ին մասով:
