Այսօր՝ նոյեմբերի 15-ին, մահվան ելքով վրաերթ է տեղի ունեցել
Երեւան-Աշտարակ ավտոճանապարհի 13-րդ կմ հատվածում, նոյեմբերի 15-ին, ժամը 19։30-ի սահմաններում 30-ամյա Արմեն Ե.-ն իր վարած Mitsubishi Grandis մակնիշի AD-620-DA համարանիշի ավտոմեքենայով վրաերթի է ենթարկել փողոցը չթույլատրելի հատվածով անցնող 59-ամյա Սեյրան Ղարիբյանին:
Shamshyan.com-ի փոխանցմամբ, վարորդը փախուստի չի դիմել, ահազանգել է շտապօգնություն, այնուհետեւ Ճանապարհային Ոստիկանության օպերատիվ կենտրոն, օգնել է վրաերթի ենթարկվածին տեղափոխել հիվանդանոց, սակայն ճանապարհին Սեյրան Ղարիբյանը մահացել է։
Վարորդը տեղափոխվել է բժշկական կենտրոն, որտեղ պարզվել է, որ նա ավտոմեքենան վարել է սթափ վիճակում։
Աղբյուրի տեղեկություններով, վրաերթի ենթարկվածին մարդիկ ճանաչում են որպես շիշ հավաքողի, ով հաճախակի էր օրվա տարբեր ժամերին սայլը շշով բարձած ճանապարհով անցուդարձ կատարել: Նշվում է նաեւ, որ Grandis-ը բախվել է նրա սայլին, իսկ մեկ այլ «ՎԱԶ 2106» մակնիշի ավտոմեքենա էլ վրաերթի է ենթարկել հետիոտնին եւ նրան թողնելով անօգնական՝ դիմել փախուստի։
Ոստիկանությունն ու քննչական բաժինը պարզում են այս տեղեկատվության իսկությունը։