Հայաստանի խորհրդարանը նոյեմբերի 17-ի նիստի ժամանակ երկրորդ ու վերջնական ընթերցմամբ ընդունել է Կառավարության ներկայացրած օրինագիծը՝ «Կուտակային կենսաթոշակների մասին» օրենքում եւ մի շարք հարակից օրինագծերում փոփոխություններ անելու մասին։ Քվեարկությանը մասնակցած 85 պատգամավորներից «կողմ» է քվեարկել 72 խորհրդարանական, «դեմ»՝ 11 , ձեռնպահ են մնացել երկուսը։
Հիշեցնենք, որ այդ փոփոխություններով նախատեսվում է , որ միջազգային կառույցներ գործուղված՝ Հայաստանի քաղաքացիները կկարողանան միանալ կուտակային կենսաթոշակային համակարգին։
Ինչպես ավելի վաղ նշել էր ֆինանսների նախարար Կարեն Թամազյանը, ներկայացնելով օրինագիծը, խոսքը այն միջազգային կառույցների մաիսն է, որոնք չունեն սեփական կուտակային համակարգեր ու որոնք պարտավոր են ապահովել աշխատակիցների կենսաթոշակները։ Խոսքը Հայաստանի 50 քաղաքացիների մասին է, որոնք աշխատում են միջազգային կազմակերպություններում՝ ԵՏՄ-ում, ԵՄ-ում ու այլ կառույցներում։ Եվրազիական տնտեսական հանձնաժողովը, այդ թվում, պարտավոր է լինելու ապահովել համակարգում աշխատող Հայաստանի ռեզիդենտների կենսաթոշակների վճարումները։ Ընդ որում նրանց համար վճարները իրականացնելու են գործատուները այն ծավալով, որը սահմանված է ՀՀ օրենսդրությամբ։
