Երեւանի Կարեն Դեմիրճյանի անվան Մետրոպոլիտենից որեւէ ահազանգ չի ստացվել եւ Մետրոպոլիտենում զինված անձ չի եղել: Այս մասին NEWS.am-ի հետ զրույցում ասաց Երեւանի Կարեն Դեմիրճյանի անվան Մետրոպոլիտենի մամլո խոսնակ Նինել Վարդանյանը:

«Դա աբսուրդ է, նման բան գոյություն չունի, ես չգիտեմ այդ տեղեկատվությունն ումից է դուրս եկել եւ ինչ նպատակով: Ճշմարտությունը հետեւյալն է, որ Հանրապետության կայարանից կարճ հեռավորության վրա դատարկ գնացքը տեխնիկական խնդիր է ունեցել, կանգ է առել։ Մասնագետների ջանքերով շուտափույթ գնացքը հանվել է գծից եւ երթեւեկությունը կարգավորվել է: Ուղղակի մի որոշ ժամանակ երթեւեկությունը միակողմանի է կազմակերպվել»,-ասաց նա:

Նինել Վարդանյանը նշեց, որ այս պահին Մետրոպոլիտենի աշխատանքը բնականոն հունի մեջ է:

Նրա խոսքով,

Ավելի վաղ տեղեկատվություն էր տարածվել, որ Երեւանի Կարեն Դեմիրճյանի անվան Մետրոպոլիտենի Հանրապետության հրապարակի հատվածում մի ժամից ավելի է, որ երթեկությունը ժամանակավորապես դադարեցվել է, քանի որ «Երիտասարդական» մետրոյից մի քաղաքացի՝ զինված դանակով եւ հրազենով, դուրս է եկել եւ սպառնում է քաղաքացիներին։

Այս առնչությամբ, ԱԻՆ-ի տարածած հաղորդագրության մեջ նշվում է. «նոյեմբերի 19-ին, ժամը 14:25-ին ահազանգ է ստացվել, որ «Կարեն Դեմիրճյանի անվան Երեւանի Մետրոպոլիտեն»- ում տեղի է ունեցել պայթյուն: Դեպքի վայր է մեկնել արտակարգ իրավիճակների արձագանքման խումբը:

Հետադարձ զանգով կապ է հաստատվել մետրոպոլիտենի գլխավոր տնօրեն՝ Փ. Յայլոյանի եւ գնացքային կարգավար Մարտիրոսյանի հետ, ովքեր տեղեկացրել են, որ «Հանրապետության Հրապարակից» դեպի «Զորավար Անդրանիկ» կայարան մեկնող գնացքի շարժակազմում առկա է տեխնիկական խնդիր, ինչի հետեւանքով դադարեցվել է գնացքի ընթացքը։

Ուղեւորներն անվնաս դուրս են եկել գնացքից»։