«Տաշիր» ընկերությունների խումբը չի քննարկում Հայաստանում նոր ատոմակայանի շինարարության մեջ ներդրումներ իրականացնելու հնարավորությունը։ Այդ մասին նոյեմբերի 22-ին կայացած ասուլիսում հայտարարել է «Տաշիր» ընկերությունների խմբի փոխնախագահ, «ՀԷՑ» ՓԲԸ տնօրենների խորհրդի նախագահ Կարեն Դարբինյանը:
Միաժամանակ, սակայն, «Տաշիրը» հետաքրքրություն է ցուցաբերում Իրանի հետ սահմանին Մեղրիի ՀԷԿ-ի կառուցման նկատմամբ։ Դարբինյանի խոսքով, այդ նախագիծն այժմ քննարկման փուլում է։ «Լիովին հնարավոր է, որ մենք մասնակցենք դրան եւ անհրաժեշտ ներդրումներ իրականացնենք»,- հստակեցրել է նա՝ հավելելով, որ ներկայումս «Տաշիրն» ավելի մեծ ուշադրություն է հատկացնում Շնողի ՀԷԿ-ի շինարարությանը։
Լոռու մարզում «Շնող» հիդրոէլեկտրակայանի շինարարության ներդրումային ծրագրի շրջանակներում, Դեբեդ գետի հյուսիսային հատվածում ընկերությունը ծրագրում է ներդրումներ իրականացնել մոտ 200 մլն դոլարի չափով։ Ծրագիրը մշակվել է դեռ 70-ական թվականներին եւ ռազմավարական նշանակություն ուներ՝ հաշվի առնելով, որ Դեբեդի ջրային ռեսուրսներն օգտագործվում են ոչ ամբողջությամբ։ Ներդրումային նախագծի իրականացումը պետք է մասմաբ լրացնի այդ բացը։ Սակայն, Կարեն Դարբինյանի խոսքով, ներդրումների բացակայության պատճառով ծրագիրը մինչ օրս չի իրականացվել։
««Տաշիր» ընկերությունների խումբն այսօր առաջարկում է նոր մոտեցումներ եւ նորարական լուծումներ «Շնող» ՀԷԿ-ի շինարարության համար, որոնք թույլ կտան զգալիորեն բարձրացնել ծրագրվող արտադրությունը 76 ՄՎտ-ից 120 ՄՎտ-ի»,- նշել է նա։
Նոր կայանը կապահովի Հայաստանում էլեկտրաէներգիայի սպառման մոտ 6 տոկոսը։ Նախագիծն իրականացվելու է ամերիկյան «The Robbins Company»-ի եւ Համաշխարհային բանկի կազմում ընդգրկված Միջազգային ֆինանսական կորպորացիայի հետ համատեղ։
