Շահույթից հարկումը կիրականացվի միայն այն բանից հետո, երբ ընկերությունների բաժնետերերի ժողովը որոշում կընդունի շահույթի տեղաբաշխման մասին: Հարկային օրենսգրքում համապատասխան լրացումները հավանություն ստացան կառավարության նոյեմբերի 23-ի նիստում:
Ֆինանսների նախարար Վարդան Արամյանը նշեց, որ Հարկային օրենսգրքում նախատեսված փոփոխությունների 90 տոկոսն իրականացվում է տնտեսվարողներից ստացած առաջակությունների հիման վրա: «Մեր այսօրվա իրավական կարգավորմամբ եթե մինչեւ հաջորդ հաշվետու տարվա հունիսի 30-ը ընկերությունների բաժնետերերի ընդհանուր ժողովի ժամանակահատվածում որոշում չի ընդունվում շահույթի տեղաբաշխման մասին, ապա պետությունն, այնուամենայնիվ, իր մասը վերցնում է հարկի տեսքով: Դրանով ի սկզբանե նպատակ էր դրված փակել այն բոլոր ուղիները, որոնցով արտասահմանյան կապիտալով գործող ընկերությունները կկարողանային մեր տնտեսությունից իրենց միջոցները դուրս բերել առանց հարկվելու: Սակայն հաշվի առնելով, որ նման մոտեցումը հակասում է կորպորատիվ կառավարման սկզբունքին, որոշվեց այս նորմը հանել»,- պարզաբանեց ֆինանսների նախարարը:
Վարդան Արամյանն անդրադարձավ նաեւ ֆիզիկական անձանց համար գործող նորմերին: Նա հիշեցրեց, որ գործողության մեջ է դրվում կարգավորումը, որի համաձայն Հայաստանի ռեզիդենտ չհամարվող ֆիզիկական անձանց եւ ռեզիդենտ ֆիզիկական անձանց համար կգործի համապատասխանաբար 10 եւ 5 տոկոս շահութահարկ: «Խնդիրն այն է, որ այնտեղ չի հստակեցվում, թե հատկապես երբ է սկսելու գործել այս նորմը՝ 2018-ից հետո՞, թե՞ այնուամենայնիվ նաեւ դրանից առաջ: Այդ պատճառով փոփոխություններ են կատարվում, որոնց համաձայն՝ եթե միչեւ 2018 թվականը մենք նրանց խոստացել ենք զրոյական տոկոսադրույք, եւ նրանք շահույթ են կուտակել, որը հետո պետք է տեղաբաշխեն, ապա հասկանալի է, որ այդ կուտակումները չպետք է ենթարկվեն հարկման: Իսկ 2018-ից հետո նոր կանոնների ներմուծումից հետո դրանք կհարկվեն»,- եզրափակեց Վարդան Արամյանը:
