ՀՀ Կենտրոնական բանկին կրկին շնորհվել է ամենաբարձր «պլատինիում» մակարդակի ACCA (Որակավորված երդվյալ հաշվապահների ասոցիացիա) հավատարմագրված գործատուի կարգավիճակ՝ հաստատելով, որ այն աջակցում է իր աշխատակիցներին հաշվապահության եւ ֆինանսների ոլորտում աշխարհում առաջատար հանդիսացող ACCA մասնագիտական որակավորման ձեռք բերման գործում:
Հայաստանի ԿԲ-ից NEWS.am-ին հայտնում են, որ ՀՀ Կենտրոնական բանկը «պլատինիում» մակարդակի ACCA հավատարմագրված գործատու է 2011 թ.-ից: Կարգավիճակը շնորհվում է երեք տարի ժամկետով, որի ավարտին գործատուն կրկին անցնում է գնահատում՝ սահմանված չափանիշներին իր համապատասխանությունը հաստատելու նպատակով:
Կարգավիճակի շնորհումը հավաստում է, որ Կենտրոնական բանկը բարձր է գնահատում եւ ամեն կերպ խթանում է իր անձնակազմի գիտելիքների ու հմտությունների շարունակական զարգացումը:
Կարեւորելով ֆինանսների, հաշվապահության եւ կառավարման ոլորտի գիտելիքներն ու հմտությունները, որ աշխատակիցները ձեռք են բերում ACCA որակավորում ստանալիս՝ հավաստագիրը այդ ոլորտի աշխատակիցների մասնագիտական գիտելիքները միջազգային չափանիշներին համապատասխան դարձնելու համար լավագույն միջոցներից մեկն է:
