Հանրաքվեի նախապատրաստման փուլում Մասուդ Բարզանին հայտարարում էր, որ Իրաքի Քուրդիստանում հանրաքվեից հետո հայերի վիճակը զգալիորեն կլավանա, սակայն դա տեղի չի ունեցել: Այս մասին նոյեմբերի 25-ին լրագրողների հետ հանդիպման ժամանակ հավաստիացրեց քրդական հարցով փորձագետ Կարեն Հովհաննիսյանը:
Նրա խոսքով՝ Բարզանին անգամ խոստացել էր, որ հայոց լեզուն կդառնա նորաթուխ պետության պետական լեզուներից մեկը: «Մինչդեռ ռազմական գործողություններից հետո հարկ է նշել, որ հայերի վիճակը գոնե այն շրջաններում, որտեղ ռազմական գործողություններ են ընթացել, կտրուկ վատացել է»,- պարզաբանեց փորձագետը՝ նկատելով, որ ռազմական գործողությունների նախնական փուլում հայերին ավելի մեղմ էին վերաբերվում՝ ջանալով նրանց չնկատել:
Սակայն, ինչպես նշեց Հովհաննիսյանը, հոկտեմբերի 18-ից հետո իրավիճակը փոխվել է: Արեւելագետի կարծիքով՝ սա կապված է ոչ այնքան ազգային պատականելության, որքան հայերի կրոնական եւ կուսակցական պատկանելության հետ, որոնց մեծամասնությունն աջակցել է Բարզանիին: Այսպես՝ «Գազբիշաբի» խմբավորման կողմից, որի մեջ կան նաեւ թուրքմեններ, սկսել են հայ բնակչության վրա ճնշում գործադրել: Դրանից զատ, այս խմբավորման ճնշումներին են ենթարկվել նաեւ եզդիները: Նրանք առավել դաժան ճնշման են ենթարկվել Սինջարում:
Հիշեցնենք, որ Քուրդիստանի ինքնավար մարզը սեպտեմբերի 25-ին Իրաքից անկախանալու հանրաքվե էր անցկացրել, որի ժամանակ անջատման օգտին էր քվեարկել քրդերի մոտ 93 տոկոսը: Բաղդադը հանրաքվեի անցկացմանն իր համաձայնությունը չէր տվել եւ հանրաքվեի արդյունքները չէր ճանաչել:
Քրդերի անցկացրած հանրաքվեից հետո Բաղդադը քրդական շրջանային կառավարության նկատմամբ մի շարք պատժամիջոցների էր դիմել, ինչպես նաեւ ուժային գործողություն սկսել ինքնավարության վիճելի տարածքներում, առաջին հերթին՝ Քիրքուք նահանգում: Կողմերը փորձում են երկխոսություն վարել, սակայն մի շարք հարցերում հակասությունները պահպանվում են:
