Եգիպտոսի խորհրդարանը նոյեմբերի 27-ին արտահերթ նիստ կգումարի՝ կապված Սինայի թերակղզում տեղի ունեցած ահաբեկչության հետ: Այդ մասին հաղորդում է Al-Youm Al-Sabia պարբերականը:
Ինչպես հայտնել է Ներկայացուցիչների պալատի պատգամավոր Մուհամմեդ Շերիֆը, «հանդիպման ժամանակ կհայտարարվի երկրի քաղաքական ղեկավարության՝ ահաբեկչությունն արմատախիլ անելու քայլերին խորհրդարանի աջակցելու մասին եւ կհաստատվի հիմնադրույթ՝ համաձայն որի Եգիպտոսի ազգային անվտանգությունն ամեն ինչից վեր է»:
Հիշեցնենք, որ նոյեմբերի 24-ին՝ աղոթքի ժամանակ, ահաբեկիչները Ալ Արիշ քաղաքից ոչ հեռու՝ Սինայի հյուսիսում գտնվող Էր Ռոուդի մզկիթում ռումբ են պայթեցրել, իսկ հետո սկսել են կրակել մզկիթից դուրս փախչող մարդկանց վրա: Ահաբեկիչները 25-30 հոգի են եղել: Նրանք հինգ մեքենաներով մոտեցել են մզկիթին, հագին ունեցել են զինվորականին նմանվող հագուստ: Զինյալները դիրքավորվել են մզկիթի շուրջ՝ նաեւ դռների ու լուսամուտներին, եւ ավտոմատ զինատեսակներից կրակ են բացել աղոթող մարդկանց ուղղությամբ:
Վերջին տվյալներով՝ 305 մարդ, որից 27-ը երեխաներ, զոհվել են եւս 128-ը՝ վիրավորվել:
