«Բացառապես մեխանիկական աճի հաշվին մենք հնարավորություն կունենանք Հայաստանում ստանալ 4 միլիոն բնակչություն։ Այս մասին, նոյեմբերի 25-ին, Ջերմուկում լրագրողների հետ հանդիպման ժամանակ նշել է Աշխատանքի եւ սոցիալական հարցերի նախարար Արտեմ Ասատրյանը, հաղորդում է «Ազատություն»-ը։
Նրա խոսքով, ժողովրդագրական վիճակը հնարավորություն կա փոխելու, քանի որ դրա պոտենցիալը եւ անհրաժեշտությունը կա, եւ որ մինչեւ 2040 թվականը 4 միլիոն բնակչություն ունենալն ինքը ռեալ է համարում:
Առաջիկա 23 տարիների ընթացքում Հայաստանի բնակչությունը առնվազն 4 միլիոնի հասցնելու նպատակի մասին հայտարարել է նախագահ Սերժ Սարգսյանը: Նախարարն ասաց, որ նախագահի ասածը պետք է փորձեն իրականացնել, եւ թեեւ շատ դժվար խնդիր է, բայց այդ ուղղությամբ կաշխատեն:
Ասատրյանը հայտնեց, որ առանձնացրել են երեք գերակայություն: Առաջինը, նրա խոսքով, պետք է նպաստել ծնելության աճին, քանի որ ըստ վերլուծությունների՝ դրա պոտենցիալը կա: Հաջորդ առաջնահերթությունը, ըստ նախարարի, բնակչության մեխանիկական աճ ապահովելն է, եւ իրենք անելու են հնարավոր բոլոր ծրագրերը, որպեսզի 4 միլիոն բնակչություն ունենալու տեսլականը ապահովվի, քանի որ դա անվտանգության խնդիր է:
4 միլիոն բնակչություն ունենալու համար հաջորդ ծրագիրը, որի վրա պետք է աշխատեն, արտագաղթածների ներգաղթն ապահովելն է:
Ծնելիության աճին նպաստող ամենակարեւոր գործոններից մեկն Արտեմ Ասատրյանը համարում է եկամուտ ստեղծելը եւ երեխայի խնամքը զուգակցելու հնարավորություն ունենալը, որպեսզի երկու ծնողն էլ կարողանան աշխատել: Դայակների ինստիտուտի ներդրման նախաձեռնությունը նախարարը առարկայական քայլերից մեկն է համարում: Ասատրյանը վստահեցրեց, որ այս բոլոր միջոցառումների, ծրագրերի ուղղությամբ արդեն առարկայական քայլեր են իրականացվում, եւ դայակների ինստիտուտի հետ կապված նախաձեռնությունը այդ շարքից է:
Երեք ամսվա ընթացքում պետք է բոլոր ծրագրային ուղղությունները, ֆինանսավորումները ներկայացնեն, ասաց աշխատանքի եւ սոցիալական հարցերի նախարարը: