Ընտանեկան բռնության մասին օրինագիծը այն հարցն է, որի դեպքում հայ հասարակությունը եւ մասնավորապես, հայ կանայք պետք է որոշեն, քանի որ օրենքը հենց իրենց համար է։ Այս մասին, այսօր՝ նոյեմբերի 27-ին, լրագրողների հետ հանդիպման ժամանակ նշել է Հայաստանում ԵՄ պատվիրակության ղեկավար Պյոտր Սվիտալսկին՝ անդրադառնալով ընտանեկան բռնության մասին օրենքի նախագծին։
«Մենք որպես երկրի դիվանագետներ շատ ուշադիր հետեւում ենք այս հարցի շուրջ իրադարձությունների զարգացմանը»,-նշել է նա՝ ավելացնելով, որ չի պատրաստվում մասնակցել քննարկումներին, սակայն մատները խաչած սպասում է։
Ավելի վաղ NEWS.am-ը հայտնել էր, որ դեկտեմբերի 12-ին, ժամը 10:00-ին կգումարվի Ազգային ժողովի արտահերթ նիստ: Նիստի օրակարգում, ի թիվս այլ հարցերի, ներառված է «Ընտանիքում բռնության կանխարգելման, ընտանիքում բռնության ենթարկված անձանց պաշտպանության եւ ընտանիքում համերաշխության վերականգնման մասին» լրամշակված օրինագիծը։
Նշենք, նաեւ որ հիշյալ օրենքի նախագիծը մինչեւ լրամշակումը բուռն քննարկման թեմա էր դարձել, այդ թվում՝ ՀՀԿ-ականների շրջանակում: Նրանք դեմ էին արտահայտվել օրենքի մի շարք դրույթներին եւ ՀՀԿ-ի հրավիրած նիստում սպառնացել էին դեմ քվեարկել, եթե այդ տեսքով բերվի ԱԺ եւ դրվի քվեարկության:
