ԵԱՏՄ-ին անդամակցությունը սառեցնելու առաջարկը արհեստական օրակարգ է։ Այդ մասին ՀՀԿ ԳՄ նիստից հետո լրագրողների հետ զրույցում ասել է ՀՀԿ մամուլի քարտուղար Էդուարդ Շարմազանովը՝ մեկնաբանելով ԱԺ ընդդիմադիր «Ելք» խմբակցության առաջարկը։
«Հայաստանում բազմակուսակցական համակարգը եւ բազմակարծությունը պաշտպանված է օրենքով, եւ պետք չէ զարմանալ, որ շատ քաղաքական ուժերի տեսակետները չեն համընկնում իշխող ուժի տեսակետների հետ»,- ասել է նա եւ հավելել. «Հայաստանի անդամակցության սառեցումը ԵԱՏՄ-ին, այդ օրակարգը արհեստական է։
Եղան լսումներ, «Ելք»-ի գործընկերները ներկայացրին իրենց կարծիքը, մենք մերը, բայց մի բան հստակ է։ Հայաստանը պետք է շարունակի անդամակցությունը ԵԱՏՄ-ին, որովհետեւ դա բխում է մեր շահերից»։
Ըստ Շարմազանովի, առնվազն աբսուրդ կլիներ, որ մի պետություն հնարավորություն ունենար 3 միլիոնանոց շուկայում առեւտրի փոխարեն առեւտուր անել 150 միլիոնանոց շուկայում, ու չաներ։ «Արդյոք մենք կարողացել ենք օգտագործել բոլոր հնարավորությունները, դա այլ հարց է։ Բայց ԵԱՏՄ-ն լքելը չի բխում մեր շահերից»,- ասել է Շարմազանովը։