Գերմանական ավտոհսկա Volkswagen-ի թոփ մենեջեր Օլիվեր Շմիդտը, որը պատասխանատու էր ԱՄՆ-ում ընկերության էկոլոգիական ուղղվածության համար, ամերիկյան դատարան է դիմել նամակով, որում գործատուի դեմ լուրջ մեղադրանքներ կան:
Շմիդտը պնդում է, որ ավելի քան 10 տարի Volkswagen-ը թաքցրել է ծրագրային ապահովման հնարքները եւ «դավել» Շմիդտին՝ դիտավորյալ նրան մոլորության մեջ գցելով: Շմիդտի նամակը տպագրվել է Bild պարբերականում, փոխանցում է DW-ն:
Իր խոսքով՝ Շմիդտը զղջում է, որ 2015-ի օգոստոսին՝ ամերիկյան էկոլոգիական գերատեսչության հետ հանդիպման ժամանակ, լսել է ղեկավարության հրահանգն ու «ցավոք, համաձայնվել դրանց հետեւել»:
Դրա փոխարեն, նա պետք է մերժեր հրահանգներն ու հայտարարեր, որ VW-ն «խաբեությամբ է զբաղվում արդեն 10 տարի», ընդգծել է նա:
2015-ին ԱՄՆ իշխանությունների նախաձեռնած հետաքննության արդյունքում Volkswagen-ն ստիպված է խոստովանել, որ ողջ աշխարհում վաճառվել է ծրագրային ապահովմամբ 11 միլիոն մեքենա, որը թույլ է տալիս շարժիչի էկոլոգիական չափանիշներին համապատասխանելու թեստերը մանիպուլյացիայի ենթարկել:
Իրականում VW դիզելային ավտոմեքենաների արտանետած վնասակար նյութերի պարունակությունը 40 անգամ գերազանցել է թույլատրելի չափերը: Սկանդալն ընկերության արտադրանքի շուկայից զանգվածային հետ կանչի պատճառ է դարձել՝ տեխնիկական թերությունները շտկելու համար, եւ ԱՄՆ-ի օգտատերերին՝ VW-ի կողմից փոխանցված միլիարդավոր կոմպենսացիոն վճարների հանգեցրել: