Եվրասիական միության պատրաստած Մաքսային օրենսգրքի հիմնական առավելությունն այն է, որ հիմնված է էլեկտրոնային կառավարման մոդելի վրա: Այս մասին դեկտեմբերի 5-ին ԱԺ նիստում ասաց Պետական եկամուտների կոմիտեի փոխնախագահ Վախթանգ Միրումյանը՝ ելույթ ունենալով «Եվրասիական տնտեսական միության Հարկային օրենսգրքի մասին» պայմանագրի վավերացման հարցի քննարկման ժամանակ:
Նրա խոսքով՝ Մաքսային օրենսգրքի ընդունումը զգալիորեն կկրճատի բիզնեսի լրացուցիչ ծախսերը: «Հարկ եմ համարում նշել, որ դեռեւս 2016-ի դեկտեմբերին մենք ներդրել ենք մաքսային գնի մասին հարցման էլեկտրոնային տարբերակը, իսկ արդեն 2017-ի կեսին՝ մաքսային դիմումի էլեկտրոնային տարբերակը»,- պարզաբանեց Միրումյանը՝ հավելելով, որ այսպիսով ցանկացած իրավաբանական անձ կարող է համապատասխան ծածկագիր ստանալ եւ էլեկտրոնային դիմում ներկլայացնել:
Միրումյանը նշեց, որ այս օրենսգրքով անհամեմատ կրճատվում են թե՛ ապրանքների հայտարարագրման, թե՛ տեղափոխման ժամկետները, կրճատվում են տնտեսվարող սուբյեկտների եւ մաքսային մարմիների միջեւ շփումները, եւ նոր օրենսգիրքը նախատեսում է ավելի հստակ կանոններ:
Մասնավորապես, ըստ Միրումյանի՝ մաքսային հայտարարագրերում անճշտությունների դեպքում ոչ թե կմերժեն հայտարարագիրը, այլ ուղղելու եւ մեկ ժամվա ընթացքում կատարելու հնարավորություն կտան: Բացի այդ, մաքսային հայտարարագրումն այսուհետ կլինի առանց ուղեկցող փաստաթղթերի, ներդրված է վճարումների կատարման կանխավճարային համակարգը, որը կամավոր է. տնտեսվարող սուբյեկտը կունենա կանխավճարային հաշիվ, վճարում կկատարի եւ առանց խոչընդոտի ապրանքները կտեղափոխի։
Վախթանգ Միրումյանը նշեց, որ ապրանքների մաքսային հայտարարագրման եւ բացթողնման ժամանակը կրճատվել է 6 անգամ եւ սահմանվել 4 ժամ. «Նախատեսվում է կրճատել ապրանքների բացթողման ժամկետները: Մասնավորապես՝ ապրանքների բացթողումը կատարվելու է մաքսային մարմինների կողմից մաքսային հայտարարագիրը գրանցելուց 4 ժամվա ընթացքում՝ ներկայիս մաքսային հայտարարագրի գրանցումից հետո սահմանված 1 աշխատանքային օրվա փոխարեն»:
