Հիփոթեքային վարկ ստանալու համար եկամտային հարկի վերադարձի վերաբերյալ օրենսդրության մեջ սահմանափակումներ են դրվել: Այս մասին, այսօր՝ դեկտեմբերի 8-ին, լրագրողների հետ հանդիպման ժամանակ նշել է ֆինանսների փոխնախարար Դավիթ Անանյանը:
Նա մասրամասնեց, որ խոսքը երեք սահմանափակումների մասին է. «Մենք պարզեցինք, որ այս ոլորտում սոցիալական բաղադրիչը ընդհանրապես չի գործում, իրավական այդ հնարավորությունից ավելի շատ օգտվում է այն խավը, որը սոցիալական խնդիր չի կարգավորում, այլ հերթական անշարժ գույքն է ձեռք բերում: Կարծում ենք, որ այս նորմը պետք է գործի այն մարդկանց համար, որոնք սոցիալական խնդիր ունեն լուծելու: Դրա համար առաջարկեցինք որոշակի սահմանափակումներ. Մասնավորապես, երեք սահմանափակում ենք առաջարկում:
Նախ, բնակարան ձեռք բերելու առավելագույն գին ենք սահմանում 55 մլն դրամը, այսինքն դրանից բարձր գին ունեցող անշարժ գույքի վրա այս օրենսդրությունը չի տարածվում:
Երկրորդ աաջարկում ենք սահմանափակել եկամտային հարկի վերադարձի չափը: Որպես սահման է ընդունվել եռամսյակի կտրվածքով 1,5 մլն դրամը: Այսինքն վերադարձվող եկատմային հարկը ամսական կարող է լինել ամսական 500 հազար դրամից ոչ ավելի՝ անկախ նրանից, թե քանի հոգի են վարկառուները կամ համավարկառուները: Դա համարժեք է վարկառու անձի կամ անձանց համար ամսական 1,6-1,7 մլն դրամի եկամտին: Այսինքն եթե ամուսիններից յուրաքանչյուրն ստանում է 800-900 հազար դրամ աշխատավարձ, դրանից բարձրի դեպքում նոր այդ սահմանափակումը կգործի:
Երրորդ սահմանափակումն այն է, որ հունվարի 1-ին հետո եկամտային հարկի վերադարձի հնարավորությունը միայն մեկ անգամ է տրվում, անկախ նրանից՝ անձը հանդես է գալիս վարկառու թե համավարկառու: Այսինքն եթե անձը իր եղբոր կամ մեկ ուրիշի համար հանդես է եկել որպես համավարկառու, այլեւս չի կարող իր համար հանդես գալ վարկառու: Պետությունն ասում է, որ միայն մեկ անգամ կարող եմ օգնել, քանի որ խոսքը սոցիալական բաղադրիչի մասին է»,-ասաց փոխնախարարը: