Հայկական ներմուծող ընկերությունները տարբերություն չեն տեսնում ԵՏՄ-ից եւ երրորդ երկրներից ապրանքներ ներմուծելու միջեւ: Այս մասին նրանք իրենց մտահոգության մասին հայտնեցին Ծաղկաձորում ընթացող «Հարկային ոլորտի և բիզնեսի զարգացմանն աջակցող» թեմայով սեմինար-խորհրդակցության ժամանակ:
«ԵՏՄ-ի գլխավոր գաղափարախոսությունն այն է, որ ծառայությունների ու ապրանքների տեղափոխում պետք է տեղի ունենա ԵՏՄ երկրների միջեւ, ոչ թե ներմուծում, չպետք է լինի ներմուծման խնդիր: Մենք ներմուծող ընկերություն ենք եւ այդ առումով խնդիրներ ունենք: Այսօր ապրանքներ բերելիս ԵՏՄ-ից դա նույն ձեւով է կիրառվում, ինչպես երրորդ երկրների դեպքում: Այսինքն ոչ մի տարբերություն չկա այդ ապրանքը ԵՏՄ երկրներից է եկել, թե երրորդ երկրներից»,-ասաց ընկերություններից մեկի ներկայացուցիչը:
Ի պատասխան, հարկային ոլորտի մասնագետ, Հայաստանի ՊԵԿ-ի ուսումնական կենտրոնի աշխատակից Ասանեթ Ալոյանը նշեց, որ իսկապես, ԵՏՄ-ում մաքսային ընդհանուր սահման է գործում, դրա համար չկան ներմուծման ընթացակարգեր ԵՏՄ-ի ներսում. «Բայց քանի որ ԵՏՄ մյուս երկրների հետ Հայաստանը սահման չունի, այլ երկրի միջով են ապրանքները գալիս, դրա համար ցամաքային ճանապարհով ապրանքներ բերելու դեպքում կա տարանցում ընթացակարգը: Այլ ընթացակարգեր չկան, հետեւաբար չկա մաքսատուրք, մաքսային վճար եւ այլն»:
Այդուհանդերձ, գործաարները նշեցին, որ նոր հարկային օրենսգրիրը, որն ուժի մեջ է մտնելու 2018-ի հունվարի 1-ից, հստակ չի սահմանում հասկացությունները, որ օրենսգրքում կա եւ ապրանքների տեղափոխում, եւ ապրանքների ներմուծում:
Այս առնչությամբ, ՊԵԿ-ի ներկայացուցիչները վստահեցրին, որ Հարկային օրենսգիրքը հունվարի 1-ից ուժի մեջ չի մտնելու այն տեսքով, որով ներկայացված է այսօր քննարկման մասնակիցներին. «Արդեն կա կառավարության հավանությանն արժանացած օրինագիծ, բավական ընդգրկուն, որով որոշ վերանայումներ են արվում օրենսգրքում: մասնավորապես, նշվում են մի քանի դեպքեր, երբ ակտիվների տեղաշարժը գրանցման ենթակա չէ»:
