Պաղեստինը կոչ է անում ՄԱԿ հովանու ներքո միջազգային կոնֆերանս կազմակերպել այն բանից հետո, երբ ԱՄՆ նախագահ Դոնալդ Թրամփը Երուսաղեմն Իսրայելի մայրաքաղաք էր ճանաչել, որպեսզի եւս մեկ անգամ հաստատի Պաղեստինի խնդրում գործող միջազգային բանաձեւերը։ Այս մասին ասել է Պաղեստինի ազատագրման կազմակերպության գործկոմի անդամ Վասել Աբու Յուսիֆը, փոխանցում է «ՌԻԱ Նովոստի»-ն։
«ԱՄՆ-ն մեկուսացած է ամբողջ աշխարհի արձագանքի առաջ, որը խոսում է այս արարքների վտանգավորության մասին։ Մենք ձգտում ենք խաղաղության միջազգային կոնֆերանս կազմակերպել ՄԱԿ հովանու ներքո մեր ընկերների՝ ՌԴ-ի, Չինաստանի եւ այլ երկրների մասնակցությամբ, որպեսզի հաստատենք, որ Պաղեստինի խնդրի դեպքում անհրաժեշտ է հավատարիմ մնալ ՄԱԿ Գլխավոր Ասամբլեայի եւ Անվտանգության խորհրդի բանաձեւերին»,- ասել է նա։
Հիշեցնենք, որ ՄԱԿ Անվտանգության խորհուրդը դեկտեմբերի 8-ին արտահերթ նիստ էր գումարել՝ նվիրված Երուսաղեմն Իսրայելի մայրաքաղաք ճանաչելուն։ Բոլոր 14 անդամ պետությունները հրաժարվել են սատարել ԱՄՆ նախագահի որոշումը եւ քննադատել են այն։ Սակայն հաշվի առնելով ԱՄՆ վետոյի իրավունքը՝ ԱԽ-ն համատեղ հայտարարություն կամ բանաձեւ չի ընդունել։