Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով վկա կապիտան Արտյոմ Ավետիսյանի դատաքննական եւ նախաքննական ցուցմունքներում էական հակասություններ կան գործով ամբաստանյալների բնութագրերի հետ կապված: Վկան նախաքննական ցուցմունքում նշել է, որ ամբաստանյալներից Գնել Թեւոսյանը եւ Մովսես Ազարյանը վատ առաջադիմություն են ունեցել, իսկ Վաչեն եւ Նորիկ Սահակյաննները՝ լավ: Վկան պատմել է, որ Վաչեն եւ Նորիկը մոտ ընկերներ են եղել, Վաչեն ամեն ինչ արել է, որպեսզի Նորիկն ընկերություն անի իր հետ. «Քծնում էր անընդհատ Նորիկին, որ հետն ընկերություն անի: Հայկազ Բարսեղյանը չեզոք հարաբերությունների մեջ է եղել նրանց հետ, երբ Վաչեն «մարտկոց շարվի» հրաման էր տալիս, Հայկազն ամենաուշն էր մոտենում շարքին, իսկ մյուս հրամանատարների հրամանի դեպքում` ամենաշուտը: Կարծես ցույց էր տալիս, որ արհամարհւմ է Վաչեին»:
Իսկ դատարանում բնութագրելով ամբաստանյալներին, վկան նշել է, որ Նորիկը, Գնելը եւ Վաչեն եղել են լավ հրամանատարներ. «Անմիջական ենթականերս չեն եղել, բայց ես գիտեմ ու ծառայողական առումով լավ եմ գնահատվում: Ուսման առումով իրարից տարբերվում էին, Ազարյանը եւ Գնելը ուսման մեջ թերացել են, լավ չէին սովորում, բայց հասցնում էին»:
Բացի այդ վկան նախաքննության ընթացքում պատմել է, որ 2015թ. հունվարի 28-ին՝ սպանության գիշերը, տեսել է Հայկազ Բարսեղյանին. նա ձեռքին շիշ վերադառնալիս է եղել զուգարանից: Ինքը հարցրել է, թե որտեղի՞ց է վերադառնում, Հայկազը պատասխանել է՝ զուգարանից. «Քնելուց առաջ ննջարանում տեսել եմ, որ բոլորի ծածկոցներն ուռած են, ինձ թվացել է, որ բոլորը տեղում են»:
Հունվարի 29-ի առավոտյան հերթապահ Թելման Մխիթարյանը մտել է ներս ու ասել՝ Հայկազը չկա, անկողինն ամբողջությամբ արյուն է. «Երբ ձայն տվեցի Վաչեին, որ արթնանա, նա համազգեստով մահճակալին պառկած էր , սփրթնած, վախեցած: Հետո արդեն սկսել ենք Հայկազի որոնման գործընթացը»:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: