Ընդդիմադիր «Հայրենասերների դաշինք»-ի պատգամավորների դիմումը Ախալքալաքի ժողովին, որպեսզի Հայոց ցեղասպանությունը ճանաչվի տեղական մակարդակով, այդպես էլ չհասավ լիագումար նիստի օրակարգ, հաղորդում է jnews.ge-ն: 

Նշվում է, որ շրջանային ժողովի Բյուրոն քննարկեց, սակայն դեմ քվեարկեց:

Դեկտեմբերի 11-ին Ախալքալաքի Շրջանային Ժողովի բյուրոյի նիստի քննարկմանը հինգ հարց էր ներկայացված, որոնցից 4-ը Ախալքալաքի քաղաքապետարանի համապատասխան ծառայությունների կողմից, իսկ մեկը՝ ընդդիմադիր «Հայրենասերների դաշինքի» պատգամավորների կողմից:

Ախալքալաքի «Հայրենասերների դաշինքը» պահանջում է.

Ախալքալաքի «Հայրենասերները» դեկտեմբերի 1-ին դիմել էին Ախալքալաքի Շրջանային Ժողովին, որպեսզի ճանաչեն Հայոց ցեղասպանությունը: Դիմումի մեջ մասնավորապես նշված էին հետևյալ կետերը.

. Մեկ րոպե լռությամբ հարգանքի տուրք մատուցել բոլոր ժողովուրդների ցեղասպանության զոհերի հիշատակին, որոնց դեմ կատարվեց այդ վայրագությունը:

. Ճանաչել և դատապարտել Օսմանյան կայսրության օրոք տեղի ունեցած Հայոց ցեղասպանությունը:

. Վրաստանի խորհրդարանին խնդրել հետևել շատ զարգացած երկրների օրինակին, ճանաչել և դատապարտել Օսմանյան կայսրության օրոք կատարված Հայոց ցեղասպանությունը:

. Խնդրել մեծամասնական պատգամավորին Խորհրդարանի լիագումար նիստի ժամանակ քննարկել այդ հանցագործությունը կատարված հայ ժողովրդի դեմ և լուսաբանել իրական որոշումը:

Բյուրոն քննարկեց, բայց դեմ քվեարկեց

Բյուրոյի անդամները նպատակահարմար չգտան տվյալ ժամանակահատվածում այս հարցի բարձրացումը, պատճառաբանելով, որ այն նախ պետք է բազմահարթակ հանրային քննարկումների ու խորհրդակցությունների արդյունքում համաձայնեցված բարձրացվի: Բյուրոյի անդամներն իրենց ելույթի խոսքերում նշեցին, որ աշխարհում չկա մի հայ, որ չընդունի և չդատապարտի Հայոց ցեղասպանությունը:

Ախալքալաքի Սակրեբուլոյի նախագահ Նաիրի Իրիցյանը «Հայրենասերների» պահանջի պատասխանը բացատրեց հետևյալ կերպ.

«Եթե հարցը պետք է առաջ քաշենք ու արդյունք չստանանք, ինչի՞ առաջ քաշենք: «Ալյանսը» այսօր 6 պատգամավոր ունի Վրաստանի խորհրդարանում, ինչի են դիմել, որ մեր մեծամասնական պատգամավորը այդ հարցով խորհրդարան մտնի, թող իրենց պատգամավորները հարցը բարձրացնեն խորհրդարանում: Եթե վրացին այս հարցը առաջ քաշի, ավելի լավ ու ճիշտ կլինի, հետո մեր հայ պատգամավորները թող միանան: Ախալքալաքում ելույթի ժամանակ այդ հարցը առաջ քաշել էին, այդ մարդը նույնպես ասել էր, որ գիտեք, մենք ընդունում ենք, որ դա եղած է, բայց հարցը ճանաչել մենք այսօր չենք կարող: Դրա համար լավ կլինի, որ իրենց դեպուտատների հետ համատեղ խորհրդատվություն անցնեն, հետո նոր ներկայացնեն Ժողովին», – ասաց Ախալքալաքի Շրջանային Ժողովի նախագահը:

Բյուրոյի նիստին ներկա էր նաև ընդդիմադիր «Հայրենասերների դաշինքի» կողմից շրջանային Ժողովի մեծամասնական պատգամավոր Գենադի Էլիզբարյանը, ով ամբողջ ընթացքում լուռ լսում էր գործընկերների ելույթը: Բյուրոյի 9 անդամներից 8 դեմ քվեարկեց, իսկ մեկը՝ Գենադի Էլիզբարյանը կողմ, այդպիսով մեծամասնության ձայների համաձայն Հայոց ցեղասպանության ճանաչման հարցը չմտավ Սակրեբուլոյի լիագումար նիստի օրակարգ: