Հայաստանում ԱՄՆ դեսպան Ռիչարդ Միլսը դեռ չգիտի, թե մինչեւ երբ կպաշտոնավարի այդ պաշտոնում։ Այդ մասին դեսպանն ասել է լրագրողներին այսօր՝ դեկտեմբերի 20-ին հայ-ամերիկյան դիվանագիտական հարաբերությունների հաստատման 25-ամյակին նվաիրված «Ձմեռային հրաշք» միջոցառմանը։
«Իմ պաշտոնավարման ժամկետը թերեւս փետրվարին չի լրանալու։ Այս պահին դեռ վստահ չգիտեմ, թե մինչեւ երբ եմ պաշտոնավարելու Հայաստանում որպես ԱՄՆ դեսպան։ Երբ էլ այդ ժամկետը լրանա, ով էլ որ փոխարինի ինձ այդ պաշտոնում, կշարունակի աշխատել այն խնդիրների վրա, որոնք գերակա են եւ ես առանձնացրել եմ։ Մասնավորապես, դրանք են ներդրումային, առեւտրային հարաբերությունների խորացումը, կոռուպցիայի դեմ պայքարը, մարդու իրավունքների խթանումը, աշխատանքը այն մարդկանց հետ, որոնք լծված են կոռուպցիայի դեմ պայքարի գործին»,- ասել է դեսպանը։
Նա նաեւ շեշտել է, որ հայ-ամերիկյան հարաբերությունները հետեւողականորեն զարգանում են։ «Ինձ հատկապես գոհացնում են երկու երկրների միջեւ տնտեսական եւ առեւտրային հարաբերությունները: Վերջին 12 ամիսների ընթացքում Միացյալ Նահանգների հետ առեւտրի ծավալներն աճել են 35 տոկոսով։ Բացի դրանից, վերջին երկու տարիների ընթացքում Միացյալ Նահանգներից կատարված ներդրումները կազմել են մոտ 600 մլն դոլար, եւ, հավատացած եմ, որ դրանք աճելու են»,- ասաց Ռիչարդ Միլսը։