Հայաստանում ապօրինի ծառահատումները չափազանց մեծ քանակի են, պետությանը պատճառված վնասն էլ կազմում է 2.5 մլրդ դրամից ոչ պակաս: Այս մասին այսօր՝ դեկտեմբերի 25-ին, տարեկան ամփոփիչ ասուլիսի ժամանակ ասաց բնապահպանության նախարար Արծվիկ Մինասյանը:
Մասնավորապես միայն «Դիլիջան» ազգային պարկում 2014-2017թթ. ժամանակահատվածում ապօրինի հատվել է շուրջ 10 հազար ծառ: Հայտնաբերված խախտումների վերաբեյալ գործերը հանձնվել են իրավապահ մարմիններին:
«Ազգային պարկում պահպանության ռեժիմի արդյունավետությունը բարձրացնելու եւ ապօրինի ծառահատումների կանխարգելման նպատակով առավել ռիսկային 3 տեղամասերում՝ Հաղարծին, Դիլիջան եւ Շամախյան հատվածներում պահպանությունն իրականացվում է մասնագիտացված պահնորդական ծառայություն մատուցող կազմակերպության միջոցով: Մասնավոր պահնորդական ծառայությունը, այո, դրական ազդեցություն ունի, սակայն այս պահին լիարժեք արդյունավետ չէ: Մեզ անհրաժեշտ է պրոֆեսիոնալ այնպիսի անձնակազմ, որ կապված չլինեն անտառահատների հետ, ստանան պատշաճ աշխատավարձ, ապահովագրություն ունենան: Այս հարցը դեռ լուծված չէ,, սակայն, պետք է նշեմ, որ 2018թ.-ի համար հատուկ պահպանվող տարածքների աշխատակիցների կյանքն ու առողջությունն ապահովագրել ենք»,- ասաց նախարարը: