Զիմբաբվեի հարավում գտնվող Մատոբո ազգային պարկում կոկորդիլոսների հարձակման հետեւանքով զբոսաշրջիկ է զոհվել, հաղորդում է Lenta-ն՝ վկայակոչելով The Herald թերթը: Միջադեպը տեղի է ունեցել դեկտեմբերի 31-ին, երբ զբոսաշրջիկը փչովի մակույկով զբոսնելիս է եղել պարկի ջրամբարում: Դրանում ապրող կոկորդիլոսները հարձակվել են տղամարդու եւ նրա ուղեկցի վրա:
«Ջոն Բոումանն ու Ռոզմարի Միտչելը հարձակման են ենթարկվել, երբ մակույկով լողալիս են եղել Մատոբո ազգային պարկի՝ կոկորդիլոսներով լի ջրամբարում, - հաղորդել է պարկի ներկայացուցիչ Թինաշե Ֆարավոն (Tinashe Farawo): — Երկուսին էլ հրատապ հիվանդանոց են տեղափոխել, սակայն Բոումանը ճանապարհին մահացել է»: Միտչելը լուրջ վնասվածքներ է ստացել եւ գտնվում է Բուլավայոյի հիվանդանոցի ինտենսիվ թերապիայի բաժանմունքում:
Ինչպես նշվում է, զույգը ճամփորդելիս է եղել գործընկերների հետ: Զբոսաշրջիկների քաղաքացիությունը չի նշվում: Պարկի աշխատակիցները տեղի ունեցածից հետո կոչ են արել զբոսաշրջիկներին չմոտենալ վայրի կենդանիներին, որոնք կարող են վտանգավոր լինել: Նրանք նաեւ ափսոսանք են հայտնել, որ մահացածն ու տուժածը զբոսանքի համար օգտագործել են Մատոբոյում արգելված փչովի մակույկ, որն անվտանգություն չի ապահովում: