CES ցուցահանդեսում չինական ընկերությունը ցուցադրել է սմարթֆոնի նախատիպ, որը Synaptics-ի մատնահետքերի նոր սքաներ ունի՝ տեղադրված է էկրանի մակերեւույթի տակ, փոխանցում է PM-ն:
Անցյալ տարի վեճեր էին ծավալվել, թե սմարթֆոն արտադրողներից որն առաջինը դիսփլեյի տակ մատնահետքերի սքաներ կտեղադրի, մասնավորապես՝ խոսքն այնպիսի ընկերությունների մասին էր, ինչպիսին են Apple-ը եւ Samsung-ը: Սակայն պարզվում է, որ այս ոլորտում առաջինն է դարձել չինական Vivo արտադրողը:
Լաս Վեգասում անցկացվող CES ցուցահանդեսում ընկերությունը սմարթֆոնի նախատիպ է ցուցադրել՝ դիսփլեյում Synaptics-ի նոր մատնահետքային Clear ID հաղորդիչով, որը դեկտեմբերին էր ներկայացվել: Հաղորդվում է, որ սքաները կարող է աշխատել միայն OLED էկրանով. երբ հաղորդիչը միանում է, դիսփլեյը լուսարձակում է մատների հպման հատվածը, եւ գործարկվում է օգտատիրոջ նույնականացման գործընթացը:
CES-ում ցուցադրված Vivo-ի նախատիպը 6-դյույմանոց էկրանով եւ անշրջանակ դիզայնով սմարթֆոն է: Ընկերությունը չի հայտարարել նոր սարքի անվանումը, եւ դեռեւս հայտնի չէ, թե երբ տեղի կունենա սարքի լիարժեք ներկայացումը:
