Ռուսաստանն իր պատվիրակությանը չի ուղարկի Եվրոպայի խորհրդի Խորհրդարանական վեհաժողովi (ԵԽԽՎ) հունվարյան նստաշրջանին, քանի որ վեհաժողովի կանոնակարգում ազգային պատվիրակությունների իրավունքների՝ խտրականությունից պաշտպանելու վերաբերյալ փոփոխություններ չեն արվել: Այս մասին «ՏԱՍՍ»-ին հայտնել է ՌԴ Պետական դումայի փոխխոսնակ Պյոտր Տոլստոյը, որը խորհրդարանի ստորին պալատում համակարգում է միջազգային գործունեությունը:
Նրա խոսքով՝ ԵԽԽՎ լիագումար նիստի աշխատանքներից ձեռնպահ մնալու Ռուսաստանի որոշումը ուժի մեջ է մնում մինչեւ կառույցի կանոնակարգի փոփոխությունը: «Սակայն այս հարցով խորհրդակցություններ ԵԽԽՎ անդամների հետ մենք վարել և վարելու ենք, որպեսզի համոզենք մեր գործընկերներին, որ ազգային պատվիրակությունների հանդեպ ցանկացած խտրականություն առաջին հերթին վնասում է հենց կազմակերպությանը»,- ընդգծել է նա: