Ճապոնիայի եւ Ֆրանսիայի կառավարությունները մտադիր են համաձայնության գալ ծովային ականների հայտնաբերման համար հատուկ սարքերի համատեղ մշակման շուրջ: Ինչպես հաղորդում է «ՏԱՍՍ»-ը՝ վկայակոչելով Yomiuri Shimbun թերթը, այս թեման կքննարկվի հունվարի 26-ին Տոկիոյում կայանալիք արտաքին գործերի եւ պաշտպանության նախարարների մասնակցությամբ հանդիպման ժամանակ:
Տոկիոն մտավախություն ունի, որ եթե Կորեայի թերակղզում իրավիճակը վատթարանա, ԿԺԴՀ-ն կարող է ականներ տեղադրել Ճապոնական ծովում, ինչը մեծապես կխոչընդոտի ամերիկյան ավիակիրների եւ այլ նավերի տեղաշարժմանը: Եթե դա տեղի ունենա, ապա ԱՄՆ-ն ականազերծմանն աջակցելու համար, ամենայն հավանականությամբ, կդիմի Ճապոնիայի ինքնապաշտպանական ուժերին: Այդ իսկ պատճառով Ճապոնիան ցանկանում է համապատասխան հուսալի տեխնոլոգիաներ ունենալ:
