«Ելք»-ն այն քաղաքական ուժն է, որ ունի և՛ մանդատ, և՛ քաղաքական ու բարոյական իրավունք՝ ժողովրդին առաջնորդելու, եթե ժողովուրդը դա ցանկանա»: Այս մասին այսօր Ազգային ժողովում հրավիրած ասուլիսում հայտարարել է «Ելք» խմբակցության ղեկավար Նիկոլ Փաշինյանը:
Լրագրողները հետաքրքրվել են՝հունվարի 19-ին հրավիրած բողոքի երթը ինչ արդյունք կարող է ունենալ, Փաշինյանը պատասխանել է. «Դա մեծապես կախված է ՀՀ քաղաքացիների մասնակցության մակարդակից, ըստ էության այսօր կամ վաղը ՀՀԿ մեծամասնությունը դիրքրոոշում է որդեգրում, որ ՀՀ քաղաքացիներն ըմբռնումով են մոտենում թանկացումներին, քարտ բլանշ են տվել իրենց այդ պրոցեսներն իրականացնելու, գործուն քայլեր չձեռնարկելու համար: Մենք հստակ ուզում ենք, որ դա հասկանալի լինի, որ թանկացումների հետագա ծավալումը կասեցնելը քաղաքական պահանջ է»:
Նա ասել է, որ տներում արտահայտված պասիվ դժգոհությունը լծակ չէ, որ կարողանան ՀՀԿ-ին ստիպել գնալ զիջումների, միայն եթե կարողանան ի ցույց դնել այդ պահանջը, այդպես կկարողանան հաջողության հասնել: «Մենք առաջ ենք քաշում շատ հստակ պահանջ՝ «Հարկային օրենսգրքի» փոփոխություն, նաև ներկայացնում, թե ինչպես ենք պատկերացնում այդ պահանջի ի կատար ածումը»,-ասել է պատգամավորը՝ նշելով, որ եթե հազարավոր մարդիկ դուրս գան փողոց ու պահանջ դնեն, իրենք այդ ժողովրդի հետ կգան խորհրդարան ու կպահանջեն, որ հրապարակային խոստանան, որ զիջումներ են լինելու:
Հարցին, թե եթե ժողովուրդը երթի արդյունքում դնի նաև իշխանափոխության պահանջ, «Ելքը» պատրաստ է առաջնորդել այդ շարժումը, Ն. Փաշինյանը պատասխանեց. «Ես չեմ ուզում, որ մեր կողմից ասվածը անհամեստ լինի, բայց «Ելքն» այն քաղաքական ուժն է, որ ունի և՛ մանդատ, և՛ քաղաքական ու բարոյական իրավունք՝ ժողովրդին առաջնորդելու, եթե ժողովուրդը դա ցանկանա»:
