Ծննդկան Մերի Մարգարյանի եւ նորածնի մահվան գործով այսօր՝ հունվարի 16-ին, վերջապես ուսումնասիրվեցին գործում առկա ռուսերեն փաստաթղթերի հայերեն թարգմանությունները:
Նյութերը թարգմանության էին ուղարկվել դեռեւս 2017թ.-ի հուլիսին: Հոկտեմբերին ստացված փաստաթղթերից պարզ էր դարձել, որ դրանք ըստ պատշաճի չեն թարգմանվել: Դատարանը կրկին դրանք ուղարկել էր թարգմանության: Երեւանի Շենգավիթ վարչական շրջանի ընդհանուր իրավասության դատարանում այսօր նախագահող դատավոր Դավիթ Բալայանը հայտարարեց, որ թարգմանություններին ներգրավվել են նաեւ բժիշկները, բացառությամբ ամբաստանյալ Շուշանիկ Բախշյանի: Ի դեպ, վերջինս մի քանի անգամ հրավիրվել է թարգմանչական գրասենյակ, սակայն, հրաժարվել է գնալ եւ օգնել թարգմանությունների հարցում:
Այսօր դատարանը հրապարակեց թարգմանված բոլոր փաստաթղթերը: Դրանց մի մասը վերաբերվում էր 2015թ.-ի հունիսին Մերի Մարգարյանի կողմից «Արմենիա» բժշկական կենտրոնում հետազոտություններ անցնելուն: Հիշեցնենք, որ Մերի Մարգարյանը մահացել է 2015թ.-ի հուլիսի 29-ին «Էրեբունի» բժշկական կենտրոնում, որտեղ տեղափոխվել էր հուլիսի 27-ին «Շենգավիթ» ԲԿ-ից արդեն ծայրահեղ ծանր վիճակում: Մերի Մարգարյանը «Շենգավիթ» ԲԿ է ընդունվել եւ հոսպիտալացվել հուլիսի 26-ին: Տուժող կողմը պնդում է՝ եթե բարձր ջերմություն ունեցող Մերի Մարգարյանը հոսպիտալացվեր ավելի վաղ, կյանքը փրկել կհաջողվեր: Ըստ այսօր ուսումնասիրված փաստաթղթերի՝ Մերի Մարգարյանի վիճակը հուլիսի 26-ի լույս 27-ի գիշերը ժամը 04,10-ի դրությամբ վատթարացել էր, ունեցել է հաճախասրտություն, միզարձակումն արվել է կատետրով: Բժշկի գրառման համաձայն, նաեւ անհրաժեշտ է եղել նաեւ անալիզների դինամիկային հետեւել: Մինչդեռ, ինչպես ներկայացրեց տուժողի իրավահաջորդի ներկայացուցիչ Մարինե Թովմասյանը, անալիզներն արվել են միայն առավոտյան: Թովմասյանը նաեւ սրա վերաբերյալ հարց ուղղեց Շուշանիկ Բախշյանին, սակայն, վերջինս հստակ պատասխան չտվեց՝ նշելով, որ ինքը Մերի Մարգարյանի վիճակի վատթարացման մասին իմացել է առավոտյան եւ գալով հիվանդանոց՝ սկսել են հետազոտությունները:
Դատարանը հրապարակեց նաեւ «Էրեբունի» բժշկական կենտրոնի բժիշկների ռուսերեն գրառումների թարգմանությունները: Դրանցում մանրամասն ներկայացվել են Մերի Մարգարյանի կեսարյան հատման ընթացքը, նորածնի ծնունդը եւ երկու ժամը մեկ երեխայի վիճակը:
Փաստաթղթերի ուսումնասիրությունն ավարտելուց հետո մեղադրող Արա Մնացականյանը հայտարարեց, որ պատրաստվում է կրկնակի դատաբժշկական հանձնաժողովային փորձաքննություն նշանակելու մասին միջնորդություն ներկայացրեց, հետեւաբար խնդրեց այսօրվա նիստը հետաձգել: Մեղադրողը ժամանակ խնդրեց միջնորդությունը գրավոր ներկայացնելու համար: Կողմերը չառարկեցին:
Դատավորը որոշում կայացրեց նիստը հետաձգել եւ նշանակվել հունվարի 30-ին:
Նշենք, որ դատավորն այսօրվա նիստի ընթացքում մի քանի անգամ նկատողություն արեց ամբաստանյալ Շուշանիկ Բախշյանին: Դավիթ Բալայանը բարկացավ նաեւ ամբաստանյալ Անի Բաբելյանի պաշտպաններ Կարեն Սարդարյանի եւ Գեղամ Հակոբյանի վրա, քանի որ նիստի ընթացքում բջջային հեռախոսներով ինչ-որ բան էին անում: