«Ոստիկանության մասին» ՀՀ օրենքում լրացումներ եւ փոփոխություն կատարելու մասին օրենքով ՀՀ ոստիկանության երազանքը կիրականանա եւ նա օրենքով իրավունք կունենա տեսախիցկներ տեղադրել ցանկացած տեղ Հայաստանում: Այս մասին, այսօր՝ հիշյալ օրենքի նախագծի քննարկման ժամանակ հայտարարեց «Ելք» խմբակցության ղեկավար Նիկոլ Փաշինյանը (ֆոտոռեպորտաժ):
Նրա խոսքով, օրենքը ներկայացնողներն անընդհատ նշում են, թե հանրային վայրերում են տեղադրվելու տեսախիցկները, սակայն այս օրենքը նախատեսում է տեսախցիկներ տեղադրել նաեւ ոչ հանրային վարերում. «Կարող են գնալ որեւէ մեկի դիմացի հարեւանի հետ պայմանագիր կնքեն ու ձեզ պահեն ընդհանուր տեսադաշտում: Ընդ որում, խոսքը ոչ միայն հրապարակային, այնպես էլ գաղտնի նկարհանման մասին»:
Փաշինյանը նաեւ կարծիք հայտնեց, թե ինչու է կատռավարության համար այս համատարած տեսախցիկների տեղադրման հարցն անհետաձգելի. «Որովհետեւ դիմացը ապրիլն է, եւ իշխանությանը պետք են երաշխիքներ՝ ոչ միայն իմանալ, թե ինչ են անում ընդդիմադիր, այլեւ իշխանական պատգամավորները: Չմտածեք, թե մենակ մեր տների, օֆիսների մեջ են կախելու տեսախցիկները: Ձեր տների վրա էլ են կախելու: Մեծամասնության ներկայացուցիչներ, կոչ եմ անում ձեզ ժպտացեք ու անընդհատ գովերգեք Սերժ Սարգսյանին, որովհետեւ ձեզ նկարահանում են թաքնված տեսախցիկով»,-իր խոսքն ժպիտով ամփոփեց Փաշինյանը:
Ավելի վաղ NEWS.am-ը հայտնել էր, որ ըստ ՀՀ փոխոստիկանապետ Վարդան Եղիազարյանի, «Ոստիկանության մասին» ՀՀ օրենքում փոփոխությունների վերաբերյալ օրենքի նախագիծը նախատեսում է հանցագործությունը կանխելիս կամ բացահայտելիս հասարակական կարգի պահպանությունը, այդ թվում ճանապարհային երթեւեկության անվտանգության ապահովելիս, ոստիկանության ծառայողներին իրավունք վերապահել օգտագործել տեսաձայնագրող կամ լուսանկարահանող տեխնիկական միջոցներ: Ըստ այդմ, օրենքի մակարդակով կամրագրվեն տեխնիկական միջոցների ամրագրման հիմքերը, կարգը, տվյալների պահպանման ժամկետները, կապահովվի տեղեկությունների հավաքման եւ օգտագործման նպատակի լեգիտիմությունը. այսինքն կհաստակեցվեն մասնավոր կյանքի ոլորտ ոստիկանական միջամտության սահմանները: «Հաշվի առնելով տվյալների մշակման համաչափության սկզբունքը, նախագծում տվյալների պահպանման ժամկետ է ընտրվել 7 օրը, որից հետո դրանք պետք է ոչնչացվեն»,-նշել էր նա:
