Ճապոնիայի օդային ինքնապաշտպանական ուժերը Հոնսյու կղզու հյուսիսում՝ Աոմորի պրեֆեկտուրայում տեղակայված Միսավա ռազմաբազայում հունվարի վերջին կսկսեն տեղակայել հինգերորդ սերնդի F-35 բազմաթիրախային մարտական ինքնաթիռներ: Այս մասին հաղորդում է ՏԱՍՍ-ը՝ վկայակոչելով NHK հեռուստաընկերությանը:
Նշվում է, որ 2018 ֆինանսական տարվա ընթացքում (2018 թվականի ապրիլից մինչեւ 2019 թվականի մարտը) Աոմորիում կտեղակայվեն այդպիսի 10 ինքնաթիռներ:
Նրանցից յուրաքանչյուրը գնելու համար կառավարությունը ծախսում է մոտ 15 մլրդ յեն (135 մլն դոլար): Ընդհանուր առմամբ, Ճապոնիայի պաշտպանության նախարարությունը նախատեսում է ձեռք բերել F-35 տեսակի 42 ինքնաթիռ, որոնք մշակվել են «սթելս» տեխնոլոգիաների կիրառմամաբ Lockheed Martin Aeronautics ամերիկյան ընկերության կողմից՝ ՆԱՏՕ-ի մի քանի երկրների եւ ԱՄՆ մյուս դաշնակիցների մասնակցությամբ:
Համաձայն հաստատված 2018 ֆինանսական տարվա բյուջետային նախագծի՝ Ճապոնիայում պաշտպանական ծախսերը կաճեն 1.5 տոկոսով՝ հասնելով մինչեւ 5.19 տրիլիոն յեն (45.7 մլրդ դոլար):