Երեւանի Դավիթաշեն վարչական շրջանի գազալցակայաններից մեկում հունվարի 19-ին գազալցակայանում «ԳԱԶել» մակնիշի ավտոմեքենայի գազաբալոնի պայթյունի պատճառները ճշտելու համար տեխնիկական քննություն կիրականացվի: Այս մասին այսօր՝ հունվարի 20-ին, NEWS.am-ը տեղեկանում է ՀՀ ԱԻՆ մամուլի ծառայությունից:

ՀՀ արտակարգ իրավիճակների նախարար Դավիթ Տոնոյանի հրամանով՝ ստեղծվել է Տեխնիկական քննություն իրականացնող հանձնաժողով: Հանձնաժողովի նախագահ է նշանակված ՀՀ ԱԻՆ Տեխնիկական անվտանգության ազգային կենտրոնի ղեկավարը: Հրամանում մասնավորապես ասվում է. «…4-օրյա ժամկետում տեխնիկական քննություն իրականացնել եւ ամփոփել «Քար գազ սերվիս» ՍՊԸ-ի կողմից շահագործվող (ք.Երեւան Սասնա Ծռեր 1/5) ԱԳԼՃԿ-ում 2018 թվականի հունվարի 19-ին ժամը 2320-ին Գազել մակնիշի երթուղային մեքենայի լիցքավորման ժամանակ տեղի է ունեցած պայթյունի (դժբախտ դեպքի) պատճառներն ու հանգամանքները, կազմել տեխնիկական քննության մասին եզրակացություն»:

Նշենք, որ  պայթյունի հետեւանքով վնասվածքներ ստացած տղամարդու վիճակը ծայրահեղ ծանր է:

Հիշեցնենք, որ  Սասնա Ծռերի փողոցում գտնվող «Քար Գազ Սերվիս» ՍՊԸ-ին պատկանող գազալցակայանում պայթել է թիվ 58 երթուղին սպասարկող «ԳԱԶել» մակնիշի 2809S պետհամարանիշով (վարորդ՝ 1988 թ. ծնված Գ. Դ.) ավտոմեքենայի գազաբալոնը: Պայթյունի հետեւանքով տուժածը գազալցակայանի աշխատակիցն է։