Ոչ թե Հայաստանը, այլ Թուրքիա՛ն է հրաժարվել Ցյուրիխում ստորագրված արձանագրությունների իրականացումից։ Այս մասին հայտնել է Հայաստանի ԱԳ նախարար Էդվարդ Նալբանդյանը հունվարի 29-ի մամուլի ասուլիսում՝ ամփոփելով 2017-ին ԱԳՆ իրականացրած աշխատանքները։
Նախարարը շեշտել է, որ գնդակը հիմա դաշտի թուրքական մասում է, եթե պատկերավոր արտահայտվենք։ Ու իր միջազգային հեղինակության մասին Հայաստանը չպետք է մտահոգվի, նկատել է նախարարը։
Ինչ վերաբերում է արձանագրությունները հետ կանչելու ժամկետներին (ավելի վաղ Սերժ Սարգսյանը հայտնել էր, որ Հայաստանը 2018-ի գարունը կդիմավորի առանց արձանագրությունների․-խմբ․)՝ ապա, ըստ նախարարի, որոշման մասին հայտարարությունը կարվի նախագահի նշած ժամկետներում։