Եվրամիությունն անպատասխան չի թողի եվրոպական արտադրանքի համար ԱՄՆ վարչակազմի կողմից տուրքերի սահմանումը։ «Եվրոպական միությունը պատրաստ է արագ եւ համաչափ արձագանքել, եթե մեր արտահանումը տուժի Միացյալ Նահանգների կողմից ընդունված առեւտրային սահմանափակման միջոցների արդյունքում»,-հունվարի 29-ին հայտարարել է Եվրահանձնաժողովի ներկայացուցիչը, փոխանցում է DW-ն։
Նրա խոսքով՝ Բրյուսելի համար առեւտրային քաղաքականությունը «զրոյական հանրագումարով խաղ» չէ, այնտեղ խոսք չկա «հաղթողների եւ պարտվողների» մասին։ ԵՄ-ի տեսանկյունից՝ ազատ եւ արդար առեւտրից շահում են երկու կողմերն էլ։ Ինչ պատասխան միջոցներ կարող է ձեռնարկել Եվրամիությունը, Եվրահանձնաժողովի ներկայացուցիչը չի հստակեցրել։
Հիշեցնենք, որ ամերիկյան արտադրողներին պաշտպանելու եւ «Ամերիկան առաջին հերթին» կարգախոսը գործող նախագահ Դոնալդ Թրամփի նախընտրական արշավի կենտրոնական կետերից էր։ Մի քանի օր առաջ Վաշինգթոնը նոր տուրքեր է սահմանել ներկրվող լվացքի մեքենաների եւ արեւային մարտկոցների համար, որը բացասաբար է անդրադարձել Չինաստանի եւ Հարավային Կորեայի արտադրողների վրա:
Թրամփը մաքսատուրքեր է մտցրել արեւային վահանակների եւ լվացքի մեքենաների ներմուծման համար