ՀՀ արտակարգ իրավիճակների նախարար Դավիթ Տոնոյանն ընդունեց Եվրոպական միության պատվիրակությանը՝ Եվրոպական արտաքին գործողությունների ծառայության Արեւելյան գործընկերության երկկողմ հարաբերությունների ստորաբաժանման ղեկավարի տեղակալ Դիրք Լորենցի գլխավորությամբ: Պատվիրակությունը Հայաստանում է ՀՀ-ԵՄ ենթակոմիտեի 5-րդ նիստի շրջանակներում, որտեղ քննարկվել են էներգետիկայի, տրանսպորտի, շրջակա միջավայրի կլիմայի գործողության եւ քաղաքացիական պաշտպանության հարցեր:
Հանդիպման ընթացքում քննարկվեցին 2017թ.-ի նոյեմբերի 24-ին ստորագրված ՀՀ-ԵՄ Համապարփակ եւ ընդլայնված գործընկերության համաձայնագրի շրջանակներում ՀՀ ԱԻՆ-ի եւ ԵՄ համապատասխան ենթակառուցվածքների միջեւ բնակչության պաշտպանության եւ պատրաստվածության ոլորտում համագործակցության նոր մեկնարկի եւ ընդլայնման հնարավորությունները: Մասնավորապես՝ քննարկվեցին համագործակցության իրականացման ձեւաչափերը՝ փորձի փոխանակման եւ դասընթացների միջոցով արտակարգ իրավիճակների համակարգի ինստիտուտցիոնալ կարողությունների զարգացումը եւ օրենսդրական բարեփոխումների իրականացումը:
ԵՄ կողմը հաստատեց, որ այս տարի մարտ ամսին նախատեսվող «Բնակչության պաշտպանության» եվրոպական ֆորումին հայաստանը հնարավորություն կունենա ներկայացնել բնակչության պաշտպանության ոլորտում իր առաջնահերթությունները:
Իր խոսքում նախարար Տոնոյանը շեշտեց, որ ԱԻ նախարարության կողմից բնակչության պաշտպանության եւ աղետների ռիսկի նվազեցման ոլորտում առաջնահերթությունները հստակ նախանշված են եւ ԵՄ կողմից ակնկալվում է օժանդակություն դրանք իրականացնելու ուղիների եւ գործիքակազմի կիրառման, ինչպես նաեւ՝ արդյունաբերական վտանգների տեխնիկական անվտանգության ապահովման գործընթացում:
