Եթե մարդն ակտիվորեն աշխատում է, նրա մոտ չեն կարող չլինել բացթողումներ կամ ձեռքբերումներ: NEWS.am-ի թղթակցի հետ զրույցում նշեց ԱԺ տնտեսական հարցերի հանձնաժողովի նախագահ Վարդան Այվազյանը, պատասխանելով 2010-ի ձեռքբերումների ու բացթողումների մասին հարցին:
Միաժամանակ, նա դժվարացավ նշել կոնկրետ ձեռքբերումներ կամ բացթողումներ. «Ինչպե՞ս կարող է լավ լինել: Բայց նորմալ է եղել. Ո՜չ լավ, ո՜չ վատ: Տնտեսությունը դա մեր ընթացիկ իրավիճակն է, որը զարգանում է նույնքան հավասարաչափ, որքան, օրինակ, երեխան: Արդյոք, կարո՞ղ է 3 տարեկան երեխան 2 օր հետո դառնալ 15 տարեկան: Այդպես էլ տնտեսությունն է»,- նշեց Այվազյանը, հավելելով, որ բարենպաստ պայմանների դեպքում տնտեսությունն ավտոմատ կերպով կզարգանա:
Նոր Տարին Վարդան Այվազյանը դիմավորել է «սովորական», ընտանիքի ու հարեւանների ընկերակցությամբ: Պատգամավորը, իր խոսքով, հատուկ ուշադրություն չի դարձնում Ամանորի սեղանի առատությանը: «Ես տոներից հետո ամենից շատ սիրում եմ ուտել սպաս»,- խոստովանեց նա:
Ինչ վերաբերում է Ձմեռ Պապին ուղղված ցանկություններին, հանրապետական պատգամավորը խնդրում է խաղաղություն, կայունություն, փոխըմբռնում եւ միասնություն:
Իսկ անձնական առումով նա ցանկություն հայտնեց, որ 2011-ին լրագրողներն ավելի քիչ «մուտիլովկաներ» անեն: «Ես ցանկանում եմ, որ իմ մասին խոսեն այն, ինչ իրականում կա»,- նշեց Այվազյանը, ընդգծելով, որ բարեբախտաբար, հայ հասարակությունը նման լուրերին լուրջ չի վերաբերում:
«Հասարակությունն ինձ շատ նորմալ է ընդունում: Համենայնդեպս, ես ստիպված չեմ լինում թաքնվել իմ թիկնապահների թիկունքում եւ երբեք չեմ վախեցել երեկոյան քայլել մեր մայրաքաղաքի փողոցներով»,- ամփոփեց իշխող քաղաքական ուժի ներկայացուցիչը: