Հայաստանի իշխող կոալիցիան՝ ի դեմս ՀՀԿ-ի եւ ՀՅԴ-ի,ստանձնել է գների աճի հետ կապված իրավիճակը բարելավելու պարտականությունը: Այս մասին փետրվարի 2-ին լրագրողների հետ հանդիպման ժամանակ հայտարարեց ՀՅԴ Բյուրոյի տնտեսական հետազոտությունների գրասենյակի ղեկավար Սուրեն Փարսյանը:
Նրա խոսքով՝ եթե երկրում իրականացվող տնտեսական եւ հակամենաշնորհային քաղաքականությունը չփոխվի, բնակչության՝ իշխանությունների հանդեպ անվստահությունը միայն կմեծանա, իսկ եկամուտների անհավասար բաշխումն էլ ավելի կվատթարանա: «Ղազախստանի, Ռուսաստանի եւ Բելառուսի օրինակները ցույց են տալիս, որ ռազմավարական ապրանքները, ինչպիսիք են բենզինը, սեղմված գազը եւ դիզելային վառելիքը, ավելի արդյունավետ է վաճառել էլեկտրոնային հարթակների միջոցով, ինչը նպաստում է շուկայի թափանցիկության եւ մրցունակության ապահովմանը», - ասաց Փարսյանը:
ՀՅԴ-ն, շարունակեց նա, իրավիճակը շտկելու համար առաջարկում է խստացնել հարկային վարչարարությունը վառելիքի շուկայում եւ ապահովել խոշոր միջազգային կորպորացիաների մուտքը: Բացի այդ, Տնտեսական մրցակցության պաշտպանության պետական հանձնաժողովի (ՏՄՊՊՀ) մեջ պետք է ընդգրկվեն նաեւ խորհրդարանական ընդդիմության ներկայացուցիչները: «Տեսնելով, որ հանձնաժողովը զուտ իշխանական կառույց չէ՝ հասարակությունն ավելի շատ կսկսի վստահել», - ասաց ՀՅԴ ներկայացուցիչը:
Փարսյանը վստահեցրեց, որ հակամենաշնորհային քաղաքականությունը կշարունակի մնալ ՀՅԴ-ի եւ ՀՀԿ-ի միջեւ կոալիցիոն համագործակցության հիմնական կետերից մեկը: «Շատ կարեւոր է ապահովել սոցիալական քաղաքականության ներդաշնակությունը տնտեսական եւ հարկային քաղաքականության հետ: Մենք մեր առաջարկները կներկայացնենք ՏՄՊՊՀ-ին եւ կքննարկենք հնարավոր մեխանիզմները»,- վստահեցրեց կուսակցության ներկայացուցիչը:
Նրա կարծիքով՝ գների աճի հետ կապված իրավիճակը չի կարող շտկվել միայն հանրահավաքների եւ ցույցերի անցկացման միջոցով. անհրաժեշտ են նաեւ մասնագիտական մակարդակով քննարկումներ: «Ամեն դեպքում, իշխանությունները հանրային ճնշման ներքո ստիպված են մոբիլիզացնել ուժերը եւ արմատական քայլերի դիմել»,- ամփոփեց ՀՅԴ ներկայացուցիչը: