Պաղեստինյան հարցը ՄԱԿ պատմության հետ անքակտելի կապված, ամենահին չլուծված հարցերից է: Տասնամյակներ շարունակ միջազգային հանրությունը խրախուսել է բանակցային գործընթացը, որը պետք է նպաստեր երկու պետությունների մասին որոշման ընդունմանը: Այս մասին պաղեստինյան ժողովրդի անքակտելի իրավունքների իրականացման հանձնաժողովի հերթական նիստի բացման ժամանակ ասել է ՄԱԿ գլխավոր քարտուղար Անտոնիո Գուտերեշը:
«Անվտանգության խորհրդի անդամները բազմիցս ասել են, որ նրանք տեսնում են մի տարածաշրջան, որտեղ երկու ժողովրդավարական պետությունները՝ Իսրայելը եւ Պաղեստինը, ապրում են կողք կողքի, խաղաղ, անվտանգ եւ համընդհանուր ճանաչված սահմաններում:
Գլխավոր ասամբլեան հաստատեց, որ երկու պետությունների մասին որոշումը պաղեստինյան պետության ստեղծման միջոցով տարածաշրջանում կայունության, խաղաղության, բարգավաճման եւ զարգացման միակ ճանապարհն է», - ասել է Անտոնիո Գուտերեշը:
Անտոնիո Գուտերեշն ընդգծել է, որ Գազայում ծանր տնտեսական վիճակ է ստեղծվել: Ըստ ՄԱԿ ներկայացուցիչների՝ 2020-ին այն բնակության համար անպիտան կդառնա:
Նա նաեւ մտահոգված է Պաղեստինի փախստականների աջակցության Մերձավոր Արեւելքի գործակալության (UNRWA) ֆինանսավորման բացակայությամբ: Գուտերեշը զգուշացրել է, որ հինգ միլիոն պաղեստինցի փախստականների անվտանգությունն ու մարդկային արժանապատվությունը, ինչպես նաեւ ամբողջ տարածաշրջանի կայունությունը, վտանգված են: Գլխավոր քարտուղարը կոչ է արել միջազգային հանրությանը կանխել UNRWA-ի գործողությունների կասեցումը:
