Կուրսանտ Հայկազ Բարսեղյանի սպանության գործով Երեւան քաղաքի ընդհանուր իրավասության դատարանի Ավան եւ Նոր Նորք վարչական շրջանների նստավայրում ցուցմունք է տվել վկա Նորիկ Օհանջանյանը: Վերջինը դատարանում երկրորդ անգամ էր ցուցմունք տալիս. այս անգամ պաշպանական կողմի միջնորդությամբ: Պաշտպանական կողմերի հարցերին վկան հիմնականում պատասխանում էր՝ «չեմ հիշում», կամ՝ «առաջին ցուցմունքում արդեն ասել եմ»: Պաշտպանական կողմի հարցին՝ արդյոք սպանված կուրսանտ Հայկազ Բարսեղյանը դեպքից առաջ իր հագուստն առաջարկել է իրեն, Նորիկ Օհանջանյանը պատասխանեց. «Ես արդեն ասել եմ, ոչ մեկ ինձ հագուստ չի առաջարկել»: Վկայի խոսքով, իր ցուցմունքից հետո ծնողներին են զանգահարել ամբաստանյալներից Գնել Թեւոսյանի եւ Մովսես Ազարյանի հարազատները, սակայն, ծնողները չեն ցանկացել նրանց հետ հանդիպել. «Երեւի ուզել են, որ փոխեմ ցուցմունքս, թե չէ ինչի պիտի զանգեին, բա խի առաջ չէին զանգում»:
Վկայի ցուցմունքն այսքանով ավարտվեց. հաջորդ դատական նիստը տեղի կունենա փետրվարի 12-ին:
Այս գործով ցուցմունք չի տվել վկաներից Սամվել Սերոբյանը, Արթուր Վահանյան, դատարանը դատակոչեց նաեւ Խաչիկ Մինասյանին:
Հայկազ Բարսեղյանի սպանության մեջ մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք 2015թ. հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: