ՆԱՏՕ-ն մարտունակության բարձրացման նպատակով մտադիր է Գերմանիայի տարածքում պլանավորման, լոգիստիկայի եւ հրամանատարական կենտրոն կառուցել: Այս մասին հինգշաբթի օրը հայտնել է DPA գործակալությունը՝ վկայակոչելով իր սեփական աղբյուրները: Դրանց տեղեկության համաձայն՝ համապատասխան նախաձեռնությունը, որն արդեն իսկ աջակցություն է ստացել դաշինքի այլ անդամների կողմից, առաջարկել է Գերմանիայի Դաշնային Հանրապետության պաշտպանության նախարար Ուրսուլա ֆոն դեր Լյայենը, փոխանցում է «ՏԱՍՍ»-ը:
Որպես նոր կենտրոնի կառուցման վայր դիտարկվում են Քյոլն եւ Բոն շրջանները: DPA-ն նշում է, որ կենտրոնը, որտեղ «մի քանի հարյուր մարդ» կծառայի, չի ինտեգրվելու ՆԱՏՕ-ի հրամանատարության կառույցի մեջ եւ կարող է օգտագործվել նաեւ գերմանական զորավարժությունների համար:
Հյուսիսատլանտյան դաշինքի մեկ այլ նոր հրամանատարական կենտրոն, ըստ գործակալության, կկառուցվի Միացյալ Նահանգների տարածքում: Այլ մանրամասներ չեն հաղորդվում: Այս հարցի վերաբերյալ պաշտոնական որոշումը կկայացվի հաջորդ շաբաթ: