Հայ-բուլղարական համատեղ արդյունաբերական կոոպերացիաների հիմնումը կարող է հեռանկարային լինել: Այս մասին, այսօր՝ փետրվարի 13-ին, ՀՀ տնտեսական զարգացման եւ ներդրումների նախարարությունում Բուլղարիայից ժամանած գործարար պատվիրակության հետ հանդիպման ժամանակ նշել է ՀՀ տնտեսական զարգացման եւ ներդրումների նախարարի տեղակալ Հովհաննես Ազիզյանը:
Նախարարությունից NEWS.am-ին հայտնում են, որ պատվիրակության կազմում էին Բուլղարիայի նախագահի՝ տնտեսական զարգացման եւ ներդրումների հարցերով քարտուղարը, ՓՄՁ գործակալության գործադիր տնօրենը, Բուլղարիայի արդյունաբերական կապիտալի ասոցիացիայի եւ առեւտրաարդյունաբերական պալատի ներկայացուցիչները։
Բուլղարիայի գործարար պատվիրակությանն ընդունել է ՀՀ տնտեսական զարգացման եւ ներդրումների նախարարի տեղակալ Հովհաննես Ազիզյանը։ Հանդիպման ընթացքում քննարկվել են հայ-բուլղարական տնտեսական համագործակցության զարգացմանն առնչվող հարցեր։ Ըստ նախարարի տեղակալի, թեպետ Հայաստանի եւ Բուլղարիայի միջեւ առեւտրաշրջանառությունը բարձր տեմպեր է գրանցում, այնուամենայնիվ անհրաժեշտ է բազմազանեցնել արտահանումը։ Հովհաննես Ազիզյանը հյուրերին համառոտ ներկայացրել է Հայաստանի տնտեսական ցուցանիշները, արտոնյալ շուկաները, «Մեղրի» ազատ տնտեսական գոտու ծրագիրը եւ այլ հնարավորություններ։
Նախարարի տեղակալի խոսքով՝ համատեղ արդյունաբերական կոոպերացիաների հիմնումը կարող է հեռանկարային լինել։ Բուլղարական կողմի հետ քննարկվել են դեղագործության, հանքային ջրերի եւ ալկոհոլային խմիչքների ոլորտում համագործակցության հնարավորությունները։ Կողմերն անդրադարձել են նաեւ զբոսաշրջության ոլորտում երկու երկրների փոխգործակցությանը։
Հանդիպման ավարտին պայմանավորվածություն է ձեռք բերվել ընթացիկ տարվա երկրորդ կեսին պաշտոնական այցի եւ B2B հանդիպումների ձեւաչափով շարունակել համագործակցությունը։
