Պաղեստինը ողջունում է պաղեստինա-իսրայելական հակամարտության դիվանագիտական կարգավորման գործում Մոսկվայի դերի ամրապնդումը: Ռուսաստանը բոլոր շահագրգիռ կողմերի հետ երկար եւ լավ հարաբերություններ ունենալով, կարող է ազդել նրանց վրա` միջազգային նորմերի վրա հիմնված փոխզիջումային լուծման հասնելու համար: Այս մասին ՌԲԿ-ին ասել է Պաղեստինի քաղաքացիական գործերի նախարար Հուսեյն աշ Շեյխը:
«Տարածաշրջանում ՌԴ ներկայությունը կարող է նոր տեսլական, հակամարտության կարգավորման նոր օրակարգ ստեղծել: Այդ հարցում մենք լիովին վստահում ենք նրան եւ ողջունում ենք խնդրի լուծման հարցում Մոսկվայի դերի ընդլայնումը. այն հեղինակություն ունի եւ իրավիճակի վրա ազդեցության բոլոր միջոցները», - ասել է նա:
Աշ Շեյխը Պաղեստինի նախագահ Մահմուդ Աբասի գլխավորած պատվիրակության կազմում է, որը Մոսկվայում է գտնվում: Փետրվարի 12-ին Կրեմլում Աբասը բանակցություններ է վարել Ռուսաստանի նախագահ Վլադիմիր Պուտինի հետ:
Պուտինը բանակցություններում հաստատել է, որ Ռուսաստանը պատրաստ է ընդլայնել իր մասնակցությունը պաղեստինյան խնդրի լուծմանը «միջազգային իրավունքի եւ ՄԱԿ բանաձեւերի պաշտպանության նպատակով», ասել է ալ Շեյխը:
Կրեմլում կայացած հանդիպմանը քննարկվել է Պուտինի, Աբասի եւ Իսրայելի վարչապետ Բենիամին Նեթանյահուի միջեւ եռակողմ բանակցությունների հնարավորությունը, հաղորդում է Պաղեստինի նախարարը:
«Մենք մերժում ենք բանակցային գործընթացում ցանկացած տեսակի ԱՄՆ առաջատարությունը: Անհրաժեշտ է, որ այս գործընթացը մնա միջազգային իրավունքի դաշտում, իսկ Վաշինգթոնի գործողությունները ուղղակիորեն խախտում են ՄԱԿ որոշումները եւ միջազգային նորմերը», - ասել է քաղաքական գործիչը:
