Ժիրայր Սեֆիլյանին եւ Գեւորգ Սաֆարյանին առաջադրված մեղադրանքները շինծու են եւ իրականությանը չեն համապատասխանում: Այս մասին փետրվարի 15-ին «Մեդիա կենտրոն» մամուլի ակումբում «Քրեական գործով Ժիրայր Սեֆիլյանին եւ Գեւորգ Սաֆարկային առաջադրված մեղադրանքները եւ տվյալ գործով պաշտպանության մտահոգությունները» թեմայով քննարկման ժամանակ ասաց Գեւորգ Սաֆարյանի եւ Ժիրայր Սեֆիլյանի փաստաբան Տիգրան Հայրապետյանը:
Նրա խոսքով՝ Ժիրայր Սեֆիլյանին մեղադրել են 3 հանցագործության կատարման մեջ: Առաջինն այն է, որ նա իբր 2011 թվականին ծրագրել է զանգվածային անկարգություններ կազմակերպել: Կարծում եմ՝ բոլորդ գիտեք, որ Ժիրայր Սեֆիլյանը ծրագրել էր իշխանափոխություն կազմակերպել, այլ ոչ թե մի քանի ավտոմեքենաներ հրկիզել»,- պարզաբանեց փաստաբանը: Ըստ որում՝ ինչպես նշեց փաստաբանը, լուրջ հիմքեր չկան, որ կվկայեն, թե Սեֆիլյանը ծրագրել էր զանգվածային անկարգություններ կազմակերպել, իսկ դատախազությունը մեղադրանքի հիմքում դրել է Սեֆիլյանի հայտարարությունները որոնք նա կատարել էր 2015 թվականի ապրիլի 24-ին:
Դրանից զատ, փաստաբանի կարծիքով՝ իր պաշտպանյալին առաջադրված մեղադրանքն անչափ խախուտ է եւ ընդհանրապես ոչ մի քննադատության չի դիմանում: Փաստաբանը քննադատեց նաեւ դատախազության մեղադրանքի այն մասը, որ իր պաշտպանյալն իբր ծրագրել էր մի շարք շենքեր գրավել եւ գործող իշխանություններին վերջնագիր ներկայացնել: Հայրապետյանի խոսքով՝ ծանրակշիռ ապացույցներ չկան, որոնք հաստատում են, որ Ժիրայր Սեֆիլյանը ծրագրել էր հակաիրավական ինչ-որ գործողություններ կատարել, քանի որ դատարան են ներկայացվել հեռախոսազրույցների ձայնագրությունները, սակայն դրանցից ոչ մեկում իր պաշտպանյալի ձայնը չի եղել: Փաստաբանը վստահ է, որ խմբի մեջ գործակալ է ներդրվել, որը եւ ստեղծել է Սեֆիլյանի դեմ մեղադրանքների առաջադրման համապատասխան հիմքը:
Հիշեցնենք, որ դատարանը Ժիրայր Սեֆիլյանին դատապարտել է 11, իսկ Գեւորգ Սաֆարյանին՝ 4,5 տարվա ազատազրկման: