Հեղինակավոր National Geographic ամսագիրն իր Ինստագրամի էջում Լեռնային Ղարաբաղին նվիրված լուսանկարներ է հրապարակել: Լուսանկարները նվիրված են Արցախի կառավարության կողմից ծնելիության խթանման նպատակով պետական ֆինանսավորման ծրագրին, որի նպատակը «բեյբի բում»-ն է:
Լուսանկարներից մեկում պատկերված է Շուշիի Սուրբ Ղազանչեցոց եկեղեցին, որտեղ կնքում են նորածին աղջնակին: Լուսանկարն արվել է 2011 թվականի հուլիսին:
«Մարիա Առուստամյանի ծնողները՝ Անուշն ու Գրիգորին, կառավարության կողմից ծնելիության խթանմանն ուղղված ծրագրի շրջանակում 765 եվրո են ստացել առաջին երեխայի համար: Կառավարության այս նախաձեռնությունը նպատակ ունի «բեյբի բում»-ի հասնել Լեռնային Ղարաբաղում: Լեռնային Ղարաբաղը փաստացի անկախ հանրապետություն է, սակայն ամբողջ աշխարհի կողմից ճանաչված է որպես Ադրբեջանի մաս»,-նշված է լուսանկարի տակ:
Երկրորդ լուսանկարի տակ արված է հետեւյալ գրառումը. «Հարսանիքի մասնակիցներն այցելում են ԼՂՀ Ստեփանակերտի խորհրդանիշ համարվող հուշարձան (Մենք ենք մեր սարերը-խմբ): Նորապսակները 575 եվրո են ստացել կառավարության կողմից ծնելիության խթանման ուղղված ծրագրի շրջանակներում:
Երրորդ լուսանկարում պատկերված է Հադրութի շրջանի Խծաբերդ գյուղի նորապսակ զույգը՝ հարսանիքից հետո: Երիտասարդ զույգը եւս մոտ 575 եվրո է ստացել կառավարության կողմից ծնելիության խթանման ուղղված ծրագրի շրջանակներում:
Բոլոր լուսանկարներն արվել են 2011 թվականի ամռանը՝ Անաստասիա Թեյլոր Լինդի կողմից: