Գերմանիան եւ Լեհաստանը տարբեր տեսակետներ ունեն «Հյուսիսային հոսք-2» գազատարի վերաբերյալ, սակայն Բեռլինը չի հավատում, որ այն սպառնալիք է ներկայացնում էներգետիկայի դիվերսիֆիկացման համար: Այս մասին հայտարարել է Գերմանիայի կանցլեր Անգելա Մերկելը, փոխանցում է Reuters-ը:
Լեհաստանի վարչապետ Մաթեուշ Մորավեցկին կոչ է արել ԱՄՆ-ին պատժամիջոցներ կիրառել «Հյուսիսային հոսք-2»-ի նկատմամբ: Ավելի վաղ ԱՄՆ պետքարտուղար Ռեքս Թիլերսոնն ասել էր, որ ԱՄՆ կառավարությունը վտանգ է տեսնում («Հյուսիսային հոսք-2»-ում) եվրոպական էներգետիկ անվտանգության համար:
«Մենք տարբեր տեսակետներ ունենք «Հյուսիսային հոսք-2»-ի վերաբերյալ»,- ասել է Մերկելը Մորավեցկու հետ Բեռլինում կայացած հանդիպումից հետո լրագրողների հետ զրույցում: «Մենք կարծում ենք, որ սա տնտեսական նախագիծ է, մենք նաեւ կողմ ենք էներգետիկ դիվերսիֆիկացմանը եւ ցանկանում ենք, որպեսզի տարանցիկ գազային շարժն Ուկրաինայում շարունակվի, սակայն մենք համարում ենք, որ «Հյուսիսային հոսք-2»-ը վտանգ չի ներկայացնում դիվերսիֆիկացման համար»,- ավելացրեց նա:
«Հյուսիսային հոսք-2»-ը Բալթիկ ծովով Ռուսաստանից Գերմանիա ձգվող 1200 կմ երկարությամբ գազատարի նախագիծ է, որը հանդիսանում է «Հյուսիսային հոսք»-ի ընդլայնումը: Հզորությամբ եւ երկարությամբ այն համապատասխանում են գործող գազատարին:
